Ақын Саят Әбеновтың жыр кеші өтті

Амангелді ауданындағы Б.Қолдасбаев атындағы ОМ басшысы Мұхаммедәлі Серікұлының бастамасымен жас ақын Саят Әбеновтың өзі оқыған білім ошағында «Жырлары бар жаныңды жадыратар» атты кездесу кеші өтті.

Кешті мектеп оқушыларын өнерге баулып жүрген музыка пәнінің мұғалімі Фархад Жүрсінов жүргізіп отырды. Арнайы жыр кешіне мектеп ұстаздары мен оқушылары және Саяттың бала күнгі достары Руслан Шегенбаев, Нұрлыбек Есмағамбетов, алғашқы ұстазы әрі сынып жетекшісі Әмина Сүлейменова және ақындыққа баулыған ұстазы Гүлназия Сыздықова арнайы қатысты.

Димаш Құдайберген алпауыт мемлекетті аузына қаратып, қазақ әншісінің қандай болатынын көрсетіп, ел мерейін үстем етіп, туымызды көкте желбіретті. Ал қолына қалам ұстаған өнер иелері шама-шарқы жеткенше оған өз қолдауын білдіріп келеді. Солардың бірі – осы Саят Әбенов. Ол жалпақ жұрттың ыстық ықыласына бөленген торғайлық айтыскер, талай хит әндердің сөзін жазған ақын. Димаш жеңіске жеткен соң, Саят Әбеновтың оған жыр арнағаны жалпақ жұрттың есінде. Жырында ол Димаштай болу қытайлықтарға арман екенін, оны қазаққа Құдай бере салғанын жеткізді.

Алғашында ауылдағы, өнердегі достарының әндеріне сөз жазып жүрген Саят, «Өлшеулі өмір» термесімен халықтың назына ілінді. «Жүрегіңнен бір орын бер, бос болса...» атты жырын тапсырыс бойынша Қазақ эстрадасының жұлдызы Қайрат Айдарбековке берді. Содан бері ақын Саяттың тасы өрге домалап, бүгінде эстрада әлемінде үлкен сұранысқа ие. Таяуда Димаш Құдайбергеновтың өзі оны іздеп келіп, әніне сөз жаздырған. Ол әннің тағдыры уақыт еншісінде.

Кеш барысында оқушылар Саяттың өлеңдерін оқып, «Туған жерім – Батпаққарам» әнін шырқады. Ал, Саяттың өзі кездесу барысында «Үш досым» және «Ұстазыма» деген өлеңдерін оқып берді. Қонақ кәде сұралып, «Жүрегіңнен бір орын бер бос болса...» әні де шырқалды. Оқушылар толғандырған сұрақтарын қойып, тұшымды жауап алды. Атаулы білім ошағының тәрбие ісінің меңгерушісі Рауан Әбішев бұрынғы көршісі Саяттың балалық шағы туралы бірсыпыра естеліктерімен бөлісті. Тағылымды кездесу соңында Саят Әбеновтың Б.Қолдасбаев орта мектебіне арнап жазылған әнұраны шырқалды.

Әнет ЖҰМАБЕК,
«Шұғыла» балалар мен
жасөспірімдер орталығы
көркемдік жетекшісі,
Амангелді ауданы