Әлем таныған дана Абай

Мемлекеттік тілдегі кітапханада ақын, әдеби тілдің негізін салушы, аудармашы, сазгер, дана әрі дара тұлға Абай Құнанбайұлының шығармашылығына арналған «Әлем Абайдың көзқарасымен» атты дөңгелек үстел өткізілді.
ҚР Үкіметінің 2020 жылғы 4 тамыздағы №495 қаулысымен 10 тамыз ресми түрде «Абай күні» болып жарияланды және мерекелер күнтізбесіне енгізілді. Абайды қалай дәріптесек те жарасады. Оның ғибратты ғұмыры мен шынайы шығармашылығы – қазақ халқына ғана емес, жаһан жұртына да үлгі-өнеге. Қаламыздың игі жақсылары бас қосқан кездесу барысында ақын шығармаларын талдай отырып, Абайды жан-жақты таныту және имандылыққа, асыл қасиеттерге, туған жердің тарихы мен тілінің қадір-қасиетін ұғындыру көзделді.
Әрине, Абай атамыз туралы қанша айтсақ та, артық емес. Ұлылықтың сырына қанық болғымыз келсе, даралықтың қандай болатынын ұғынғымыз келсе, дана Абай әлемін шарлап қайтайық деген ұстаныммен өткен іс-шарада «Кездесу» клубының мүшелерімен және оқушылардың қатысуымен Абай атамыздың өлеңдері мен қара сөздері оқылып, «Желсіз түнде жарық ай», «Көзімнің қарасы», т.б. әндері шырқалды. Рудный қаласындағы Бейімбет Майлин атындағы №7 ЖББ мектептің 9-сынып оқушысы Гүлсезім Музафарова «Ата толғауы» күйін орындап берді.
Ұйымдастырылған кітап көрмесіндегі тың деректер А.Құнанбайұлының өмір жолы мен шығармашылығын кеңінен насихаттауға үлес қосты. Көрмеде әртүрлі форматтағы кітаптар, мерзімді басылым беттерінде жарық көрген мақалалар да қойылды. Ал, «Әсемпаз болма әрнеге» өлеңі жастарды оқу-білімге жетелеп, құлшынысын оятатын керемет шығарма ретінде бағаланды.

Гүлбараш УАЛИЕВА,
Мемлекеттік тілдегі
кітапхананың меңгерушісі,
Рудный қаласы