Бір шаңырақ астында

Қазақстан – әлемдегі саяси тұрақтылығы берік елдердің бірі. Бүгінде елімізде сан түрлі ұлт өкілдері тату-тәтті өмір сүріп, әлемдік дамудың көшбасшысы болуға ұмтылып келеді. Бұл – бейбіт өмір мен тұрақтылықтың кепілі болса керек.

Жер шарының картасына көз салсақ, қазақ жерінің ұлан-байтақ атырапты алып жатқанын көреміз. Қазақ елінің көңілі де дәл сондай – кең, дархан. Соның арқасында Қазақстан жерінде 130-дан аса ұлт өкілдері татулықта өмір сүріп келеді. Ұлтаралық татулықты нығайтуға Қазақстанда тұрып жатқан әр ұлттың өкілі «Қазақстан – достық пен татулықтың шынайы мекені» дегенді ұранға айналдырып, келешек ұрпақ үшін этносаралық достықтың, конфессияаралық түсіністіктің қаймағы бұзылмауына еңбек етіп, атсалысып келеді.
Қиын-қыстау замандарда еліміздің қамқорлығы мен жақсылығын, қонақжайлылығы мен кең пейілін көрген өзге этнос өкілдері қазақ халқын жоғары бағалап, құрметтейді. Өзге ұлт өкілдері қоныстанған аймақтарда сол ұлттың тілінде балабақша, мектеп және т.б. ұйымдар міндеттерін атқарады. Тілдерінде еркін сөйлеп, ойларымен биік шыңдарды бағындырып жүргендері де бар. Бұл – еліміздің жомарттығының айқын дәлелі.
Рудный қаласындағы мемлекеттік тілдегі кітапханада Ассамблеяның 30 жылдығына арналған «Бір шаңырақ астында» атты дөңгелек үстел өтті. Іс-шарада Ассамблея тарихына тоқталып, «Кездесу» клубының мүшелері – Жақсылық Какенов, Сүндет Молдашев және Жаңбыршы Тілеуқабылов аталар сөз сөйлеп, халықтың достығы, бірлігі, татулығы туралы насихат айтты. Ал, «Алтын домбыра» студиясының өнерпаздары өнер көрсетіп, көрермен ықыласына бөленді.

Жанагул ҮРГЕНІШБАЕВА,
Мемлекеттік тілдегі кітапхананың кітапханашысы,
Рудный қаласы