Ерлікпен пара-пар әрекет

Лисаков қаласындағы мектеп оқушылары арасында «Jas Otan» ЖҚ Лисаков филиалының қаржылай қолдауымен «Ерікті болу керемет!» атты үгіт бригадаларының сайысы өтті.

Жасөспірімдер арасында еріктілікті дамыту мақсатындағы байқауға қала мектептерінің отрядтары қатысты. Атап өтер болсақ: «Асар» (Октябрь ОМ), «Лицейдің ыстық жүректері» (Лицей мектебі), «Ритм» (№1 мектеп), «Еріктілер тобы» (№4 мектеп), «Жас ұрпақ» (№3 мектеп), «Қол ұстас» (№6 мектеп) және «Жақсы» (мектеп-гимназия). Әр отряд «Үгіт бригадасы» және «Әлеуметтік бейне» аталымдары бойынша бақ сынасты.

«Әлеуметтік бейне» аталымында қатысушы топтар оқушыларды волонтерлық жұмысқа ат салысуға шақырды. Ал «Үгіт бригадасы» аталымында командалар «Ерікті болу керемет!» еріктілер қозғалысын насихаттау тақырыбын жан-жақты аша түсті. Әр бөлімде қатысушылардың барлығында бірыңғай киім, сондай-ақ, науқанға арналған арнайы плакаттар болды. Үгіт-насихат бригадаларының сөз сөйлеуі Лисаков қаласындағы «Жас Ұландықтар» арасында мектеп еріктілерінің үлкен перспективаларын көрсетті. Сайыс барысында әділ қазылар алқасы отрядтардың жұмысының ерекшелігіне тоқталып өтті.

Байқау нәтижесі бойынша Октябрь орта мектебі (жетекшісі – Ж.Алдамжарова) 1-орынды иеленді, №6 орта мектеп (жетекшісі – Г.Короткова) 2-орынға ие болды, ал №4 орта мектеп (жетекшісі – Е.Теканова) 3-тұғырға тұрақтады. Командалар дипломдармен және ақшалай сыйлықтармен марапатталды.

Дыбыс БАЛАБИЕВА,
Лидия ЧИКИШЕВА,
Балалар және жасөспірімдердің
шығармашылық орталығы
әдістемелік және мәдени-бұқаралық
бөлім меңгерушілері,
Лисаков қаласы