«Ғасырдың аңыз тұлғасы – Абай»

Абай Құнанбайұлының 175 жылдығына орай «Южный» кітапхана-филиалында мақала тақырыбымен аттас семинар қашықтан өтті. Шараны Мәдениет және тілдерді дамыту бөлімінің орталықтандырылған кітапхана жүйесі ұйымдастырды.

Ақынның өнегелі өмірін, даналығын, рухани асыл мұраларын, өлеңдері мен жырларын насихаттау мақсатында өткен семинарда «Абай мұрасының сыры» атты дәстүрлі емес «сөйлейтін» көрмені ұсындық. Ол «Дала данышпаны», «Абай дауысы – уақыт тынысы», «Өшпес өсиеттер», «Әндер дыбысы және күй үндері», «Абайтану әліппесі» бөлімдерінен тұрды. Көрмеде кітапхана қорынан жинақталған Абайдың еңбектері және Абай туралы жазылған зерттеулер, шығармалар, аудармалар қойылды. Семинар барысында көрмеден бөлек қазақ және орыс тілдерінде баяндамалар оқылды.
Мәселен «Жаһанның масштабтық шамасы» баяндамасын Шолпан Елегенқызы қазақ тілінде, ал Гүлнар Балтабайқызы орыс тілінде оқыды. Кітапхана қызметкерлері Елена Фетисова «Наследие Великого Абая» тақырыбында буктрейлер көрсетсе, Наталья Галаган «Миром признанный гений» атты Абай Құнанбаевтың ескерткіштеріне виртуалды экскурсия жасады. Кітапханамыздың тұрақты оқырмандары да семинарға үлесін қосты. Анатолий Корниенко Абай Құнанбаевтың «Жаз» өлеңін оқыса, «Көзімнің қарасы» әнін Жасұлан Махаттың орындауында тамашаладық. Ал Мұхаметқали Рахалиев Абайдың «Жасымда ғылым бар деп ескермедім» атты өленің оқыды. Семинардың толық нұсқасын instagram, You Tube әлеуметтік желісіндегі кітапханамыздың адресіне тіркеліп, тамашалауға болады.
Естеріңізге сла кетейік, биыл Қазақстанның бастамасымен және ЮНЕСКО-ның қолдауымен ақынның 175 жылдық мерейтойы жаһандық деңгейде аталып өтуде. Қазір ақынның еңбектерін халықаралық ғылыми айналымға енгізу үшін нақты және мақсатты жұмыстар қолға алынуда. Оның шығармалары әлемнің он тіліне аударылып, баспаға әзірленді. Шетелдегі елшіліктеріміздің жанынан Абай орталықтары ашыла бастады. Ақынның шығармашылығын жүйелі зерттеу үшін Л.Н. Гумилев атындағы Еуразия ұлттық университеті жанынан Абай академиясы құрылды. Бәсекеге қабілетті мемлекет болу үшін Абай мұрасын естен шығармауымыз керек. Себебі ұлт ретіндегі жаңару идеясы да оның көзқарасымен үндесіп жатқаны анық.
Елімізде 2007 жылдан бері дәстүрлі түрде өткізіліп келе жатқан «Бір ел – бір кітап» республикалық акциясы үстіміздегі жылы Абай Құнанбаевтың «Қара сөздері» кітабынан басталды. Биыл акцияға Мұхтар Әуезовтың «Абай жолы» романы таңдалды. Абай өнегесінің құны дәуір алмасқан сайын артпаса, кемімек емес. Оның қара өлең болып өрілген және қара сөз болып төгілген оралымды ойлары әлі күнге дейін көпшіліккке өмірлік бағдар.

Шолпан ӘБІЛТАЕВА,
«Южный» кітапхана-
филиалының қызметкері,
Қостанай қаласы