Ғасырға жуық ғибратты ғұмыр

Рудный қаласындағы Мемлекеттік тілдегі кітапханада қаламыздың құрметті азаматы, кенші, әуесқой ақын Қасымқайыр Дүйсенбаев атамызға арналған жас ұрпақпен тағылымға толы кездесу ұйымдастырылды.

Қасымқайыр Қазыбайұлы – Рудный қаласының іргетасын қалаушылардың бірі. Өмір жолында игі істерімен өшпестей із қалдырған атаны қала тұрғындары қатты құрметтейді. Ардақты жанның басынан өткендері есінде сақтаулы. Соның негізінде естеліктер жазып, дәуір кезеңдерін өлең, жырларымен сипаттай білген. Өндіріс орынындағы кездері де, туған жерге, өскен ортаға деген сүйіспеншілігі де өмірден көргені мен жиғаны мол қаламгердің жырларынан айқын сезіліп тұрады.

Өмір баспалдақтарын қамтыған «Тарих тағдырынан үзінділер», «Өмір тағдыр құдіреті», «Туған күндер суреті», «Жырларым менің» атты төрт өлеңдер жинағы жарық көрген және 2023 жылы «Ғасырға жуық ғибрат ғұмыр» кітабы жарық көрді. Кездесу барысында Қасымқайыр атамыздың өмір жолынан осылайша деректер келтіріп өттік. Аталған іс-шара арқылы қадірлі қонағымыздың өмірбаянын, ерен еңбегін, парасаттылығын, кәсіби кеншілік мамандығынан басқа әуесқой ақындық қабілетін де жастар арасында насихаттап, паш ету көзделді.
Шараға мектеп оқушылары, «Кездесу» клубының мүшелері қатысып, автордың өлеңдерін оқып, әндерін шырқады. Келген қонақтар да сөз алып, ыстық лебіздерін білдіріп жатты. Шара соңында Қасымқайыр атамыз барша жиналған қауымға, оқушыларға ақ батасын берді. Бүгінде ұлын ұяға, қызын қияға қондырып, бақытқа кенеліп отырған атамызға алғыстан басқа айтарымыз жоқ. Ардақты жанның дені сау, ғұмыр-жасы ұзақ болсын дейміз!

Қарасын БАҚАЕВА,
Мемлекеттік тілдегі
кітапхананың қызметкері,
Рудный қаласы