«Игі іс жасауға асық»

Осындай тақырыпта Мичурин жалпы білім беретін мектебінің өзін-өзі басқару ұйымы жанынан құрылған «Мың жаса» жасағының еріктілері мен Мичурин мектебінің жас мамандары бірлесіп, қайырымдылық акциясын өткізді.

Ата-бабадан жалғасып келе жатқан қазақ халқының өнегелі қасиетінің бірі – қариясын құрметтеу. Халық арасында «Қарты бар үйдің қазынасы бар» деп те бекер айтылмаса керек. Қазақ халқы қашанда қариясына ізет пен құрмет көрсеткен. Дей тұрғанмен, кейбір қарияларымыздың сый-құрметке бөленбей, үй шаруасын жалғыз өзі атқарып жүргені қынжылтады. Ерікті жастардың қайырымдылыққа бағытталған әрекеті жергілікті әкімдіктен көмекке мұқтаж жалғызбасты қарттардың тізімін алып, сол бойынша ақпарат жинастырудан басталды.

«Жұмыла көтерген жүк жеңіл» деп тегін айтпаса керек. Қариялардың жайын естіген жастар бірден ауыл тұрғыны, зейнеткер, педагогикалық еңбек ардагері Поповская Татьяна Ивановнаның үйіне келіп, көмек қолын созды. Олар баспана маңындағы қарды тазалап, сыртқа шығаруға жәрдемдесті. «Қарттарымыз – ұлтымыздың алтын қазынасы, сарқылмас байлығы. Ұрпақ үшін жан аямай күрескен қарттарымызды қадірлеу – біздің басты міндетіміз. Жас ұрпаққа тәлім-тәрбие беретін де сол қарияларымыз», – дейді еріктілер қатарынан табылған жас мамандар.

Жастардан қолдау тапқан қарт әжеміз де ризашылығын білдіріп: «Көмектеріңіз үшін сіздерге үлкен рақмет! Еріктілерге, жастарға және барлық қамқорлық танытқан жандарға шексіз алғысымды білдіремін. Сіздерге тек денсаулық, бастамаларыңызға сәттілік тілеймін», – деп батасын берді. Мұндай іс-шаралар адам жанына қуаныш сыйлап, әлемде жалғыз емес екенін сезіндіреді. Ал қайырымдылық жасауға асыққан жастар осындай бастаманы қос қолдап қолдайтынын атап өткен жөн. Жастарды мейірімділікке, аға ұрпаққа көңіл бөлуге тәрбиелейтін іс-шаралар жыл сайын өткізіледі және қыс бойы жалғасын таппақ.

Ерасыл ҚАЗЫБАЕВ,
Айжан ЖАБАЕВА,
Мичурин ЖББМ
басшысының тәрбие ісі
жөніндегі орынбасарлары,
Қостанай ауданы