Майдангер, ұстаз, ақын, абыз ата

Выпуск - №47 (595) : 24.12.2023

525

Рудный қаласындағы «Жастар ресурстық орталығында» «Ғабдол-Ғазиз Әмірхамзаұлы – майдангер, ұстаз, ақын, абыз ата» тақырыбында 110 жыл мерейтойына орай ғылыми-тәжірбиелік конференция өткізілді.

Халықтың рухани мұратына қызмет еткен ұлы тұлғалар аз емес. Қазақ халқы да ақынға кенде болған жоқ. Поэзия әлеміне көз салсақ, қазақ халқының арман-мұраты, шаттығы мен қайғысы ақын өлеңдеріне арқау болған. Қостанай өңірінен қазақ өлеңіне үлкен үлес қосқан талай тарлан дарындар шыққан. Солардың бірі де бірегейі – Амангелдінің тумасы Ғабдол-Ғазиз Әмірхамзаұлы. Ақын атамыздың рухына арналған конференцияны ашу үшін, сөз кезегі Рудный қаласының құрметті азаматы, ақын, журналист Арман Хасенге беріліп, баласы Ниязбек Ғазезұлы және бауыры Мүбәрак Ысқақұлы сөйледі. Тағылымды шараға Ы.Алтынсарин атындағы әлеуметтік-гуманитарлық колледжінің студенттері қатысты.

Конференцияның негізгі бөлімінде «Ғабдол-Ғазиз Әмірхамзин өмірбаяны», «Ғабдол-Ғазиз Әмірхамзаұлының ұстаздық жолы», «Ақындық жолы», «Майдан күнделігі», «Абыз ата аманаты» тақырыптарында баяндамалар тыңдалып, ақын атамыздың өлеңдері оқылды. Арнайы «Ауыл» партиясының Қостанай қалалық филиалының төрайымы Гайния Есеева, «Respubika» партиясының Қостанай облыстық филиалының маманы Ерлан Олжағұлов және А.Байтұрсынов атындағы Қостанай өңірлік университетінің Қазақстан тарихы кафедрасының меңгерушісі, PhD докторы Рауан Байдалы қатысып, жылы лебіздерін білдірді. Шара соңында Шәмшия Ғазизқызы сөз алып, келген қонақтарға алғысын білдіріп, студенттерді Алғыс хаттармен марапаттады.

Гүлбараш УАЛИЕВА,
Мемлекеттік тілдегі
кітапхана меңгерушісі,
Рудныйдың қаласы