Мектепке жол – жүрекке нұр

Әулиекөл ауданына қарасты №28 Құсмұрын орта мектебінде жыл сайын жаны жомарт, жүрегі жайсаң жандардың қолдауымен республикалық «Мектепке жол» акциясы аясында бірқатар отбасылардың балаларын мектепке дайындауға көмек көрсетіледі.
Олардың қатарында акция аясында аз қамтылған, көпбалалы отбасылардан шыққан, жетім балалар мен ата-анасының қамқорлығынсыз қалған оқушыларға көмек көрсетуді көздейді. Үсіміздегі жылы аталмыш акция дәстүрлі түрде тамыздың 1-і мен қыркүйектің 1-і аралығында ұйымдастырылды.
Аталмыш акцияның мақсаттары мен міндеттері туралы халықты ақпараттандыру мақсатымен Құсмұрын кентінің азаматтарына арнайы ақпарат бұрыштары құрылып, шаруашылық қожалықтары мен ұйымдарды акцияға үлес қосуға шақырдық. Одан бөлек жеке кәсіпкерлер мен ауылымыздың белсенді азаматтарына үндеу хаттар жіберілді. Ең алдымен, мектебіміздің ұстаздары мен қамқоршылық кеңес мүшелері тобынан құралған комиссия тобы, сондай-ақ барлық сынып жетекшілері аз қамтылған отбасы балаларының мектепке дайындық деңгейін анықтады. Жұмыла жасалған іс нәтижесінде ауылымыздың біртуар азаматтары республикалық қайырымдылық акциясына белсене қатысып, 35 оқушыға көмек қолын созды. Жүректері мейірімге толы жандардың демеушілігінің арқасында білім алушыларға мектеп формасы мен оқу құралдары табысталды.

Жаны жомарт ауыл азаматтары арасынан В.Мухаматнуров, Г.Альденова, Г.Слепцов, Ж.Шурина, С.Туткина, М.Қалиева, М.Гучигов сынды жеке кәсіпкерлер, сондай-ақ ШЧ-27, ПЧ-21 және №28 Құсмұрын орта мектебінің ұжымы бой көрсетіп, кең пейілділігін көрсетті.

Кез келген халықтың ең ұлы қасиеттерінің бірі – жомарттық. Ол адамның қызмет жасап, пейілі жақсылық жасауға құмар жанға ғана тән сипат. Қиын жағдайда қол ұшын созып, қайырымдылық жасаған азаматтарымызға алғысымыз шексіз! Сіздерге қарап, жас ұрпақ бой түзейді. Яғни өскелең ұрпақты адами-рухани іс-әрекет жасау жолында үлгі көрсеттіңіздер. Сіздерге және отбасыларыңызға амандық, дендеріңізге саулық тілеміз.

Әсемгүл АБУТАЛИПОВА,
№28 Құсмұрын ОМ
директордың ТЖ орынбасары,
Гүлдәрия ХҰСАИНОВА,
әлеуметтік педагог,
Әулиекөл ауданы