Облыстық «Ыбырай оқулары»

Қостанай облысы әкімдігінің тілдерді дамыту басқармасының ұйымдастыруымен Ыбырай Алтынсариннің 180 жылдығына орай «Ыбырай оқулары» облыстық байқауы өтті. Эпидемиологиялық жағдайға байланысты шара онлайн форматта ұйымдастырылды.

Ыбырай Алтынсариннің өмірімен таныстыру, оның рухани асыл-мұраларын насихаттау, жазушының шығармалары арқылы қоғамдық ынтымақтастықты орнықтыру, көркемсөз оқу шеберлігін, тіл мәдениетін жетілдіру мақсатын көздеген байқауға 18-29 жас аралығындағы 39 адам қатысқанын айта кеткен ләзім. Бәсірелі байқаудың нәтижесінде қатысушыларға жүлделі орындармен қатар арнайы номинациялар да берілді. Қазылар алқасынан шешімі бойынша «Менің пірім – Ыбырай» номинациясына Қостанай қаласындағы №14 мектептің мұғалімі А.Аманбаева, «Алтынсарин мұрасының білгірі» номинациясына Арқалық қаласындағы №2 әмбебап ғылыми кітапханасының қызметкері Е.Әуезхан, «Ыбырайды оқимын да тоқимын» номинациясына Меңдіқара ауданының тілдерді оқыту орталығының оқытушысы И.Мусинов иеленді.

Жүлделі орындарға тоқталар болсақ, І орынды Арқалық қаласындағы Б.Майлин атындағы №3 мектептің мұғалімі А.Сәлімжан, ІІ орынды Ыбырай Алтынсарин мемориалдық музейінің қор бөлімінің сектор меңгерушісі С.Мырзабай, ІІІ орынды Сарыкөл ауданының Урицк мектеп-лицейінің мұғалімі Е.Өміртай иеленді. Байқауға қатысып, бақ сынаған жастардың барлығына арнайы сертификат және қатысушылардың арнаулары топтастырылған жинақ кітапша табысталды. Номинация иегерлеріне Диплом және Ыбырай Алтынсариннің 180 жылдығына арнайы жасалған статуэткалар берілді. Ал жүлдегерлер болса, Дипломнан бөлек ыбырайтанушы-ғалым Серікбай Оспановтың «Ыбырай жолы» кітабымен және Ыбырай Алтынсариннің 180 жылдығына арнайы жасалған статуэткалармен марапатталды.

Бахытгүл ЗАРЛЫҚҚЫЗЫ,
Қостанай облысы әкімдігінің
тілдерді дамыту басқармасының
бөлім басшысы