Оныншы аймақ оқиды

Жыл сайын наурыздың бірінші сәрсенбісінде Дүниежүзілік дауыстап оқу күні өткізіледі. Бірі білсе, бірі білмейтін осы күнге орай «Станционный» кітапхана-филиалы «10-ыншы аймақ оқиды» атты облыстық акциясына қатысты.

Биыл дауыстап оқу үшін Абай Құнанбаевтың «Қара сөздері» таңдалды. Кітапхана қабырғасындағы тағылымды шараға «Қазақ аналары – дәстүрге жол» клубының өкілдері қатысты. Кітапханашылар іс-шара қатысушыларын қазақтың дана ақыны, қайталанбас сөз шебері, философ, қазақ әдебиетінің негізін қалаушы және тұңғыш классигінің шығармашылығымен таныстырды. Осылайша қатысушылар «Қара сөздер» кітабынан ақынның даналық ойларын оқып, өзара пікір алмасты.

Абайдың 45 қара сөздердің барлығын публицистикалық шығарма деп тануға әбден болады. Себебі қайсы-бірін оқысаңыз да, санаңызға қозғау салып, ойыңызды шымырлата түспегі анық. Тіпті білім-ғылым жайында жазылған қара сөздерден ерекше қуат алып, мотивация алатын жандар да баршылық. Осылайша Дүниежүзілік дауыстап оқу күніне орай дана ақынның шығармалары талқыланып, іс-шара соңында кітапханашы «Қазақ халқының ұлы ақыны» атты кітап көрмесіне шолу жасап өтті.

Гульхан ИСКУЖИНА,
«Станционный» кітапхана-
филиалының меңгерушісі,
Қостанай қаласы