Отбасы – басты құндылық

Қостанай қаласындағы «Западный» кітапхана-филиалында Отбасы күніне орай, «Отбасы – басты құндылық» атты даңқ сәті өткізілді. Іс-шараға Тұрғынғали, Наурызбай және Досовтар отбасылары қатысты.

Мерекелік іс-шарада отбасының құндылықтары, дәстүрлері жайлы мағлұматтар айтылды. Қатысушы отбасылар әртүрлі кезеңдер бойынша ойындарға қатысып, сұрақтарға жауап берді. Балалар «Дәстүрлер» кезеңінде суретте көрсетілген дәстүрлердің өз отбасында қалай өткізілетіні жайында айтып, ойларын анық жеткізе білді.

Ал, «Ашық микрофон» кезеңінде қойылған сұрақтарға жауап берсе, «Менің отбасым – менің байлығым» атты кезеңде «Бақытты отбасы» тақырыбында суреттер салып, отбасы туралы мақал-мәтелдер айтып, өлең жолдарын оқып, ән салып, би билеп, жалпы жан-жақты өнерлерін көрсетті. «Біз баламызды танимыз ба?» кезеңінде ата-аналар сұрақтарға жауап беріп, «Өз балаңызды тауып алыңыз» ойынына қатысты.
Осылайша, шарапаты мол іс-шара аясында әр отбасы мүшелері «Тілек ағашына» тілектерін де жазып қалдырды. Қатысқан отбасылардың әрқайсысына кітапхана атынан сыйлықтар ұсынылды. Тағылымды жиын соңында «Отбасы – бақыт мекені» тақырыптық сөресіне шолу жасалды.

Айнагүл УТЕБАЕВА,
«Западный» кітапхана-
филиалының меңгерушісі,
Қостанай қаласы