Рухани келісім – татулық негізі

Рухани келісім күніне орай, кітапханамызда «Рухани келісім – тарих және қазіргі заман» атты руханият сағаты өтті. Іс-шарада Рудный қалалық «Нұр» мешітінің бас имамы Серік Темірбекұлы мен «Кездесу» клубының мүшелері жастарға бұл күннің маңызын түсіндірді.

Рухани келісім күні – адамдарды ұлты мен діни сеніміне қарамастан, бір қоғамға біріктіретін тұрақтылық пен келісім күні. Мерекенің аталып өтілуі елімізде бірлік, татулық және сыйластық орнатуға үлкен маңызға ие. Қазақ халқында: «Отаны бірдің – тілегі бір, тілегі бірдің – жүрегі бір» деген ұғым тегін айтылмаған. Татулық пен сенімділікті серік ете отырып, мемлекетіміз өркениетке көш түзеді. Рухани келісім күні 18 қазан күні атап өтілуі осыған дәлел.
Іс-шара барысында Рудный қалалық «Нұр» мешітінің бас имамы Серік Темірбекұлы жастарға: «Адамдық пен татулық – егіз ұғым. Пендеде оның біреуі болып, біреуі болмауы мүмкін емес. Егер адам екеуінен де мақұрым болса, ол білімсіздіктің белгісі», – деп атап өтті. Ол оқушыларға Қазақстанның білімді әрі парасатты ұл-қыздары болып өсулерін тіледі. «Кездесу» клубының аға-апалары да тәрбиелі мәліметтермен бөлісті. Іс-шара барысында кітап көрмесіне шолу жасалып, викториналық сұрақтар қойылды. Ал, №14 мектептің ұстазы Лариса Даниярқызы сөз соңында кітапхана ұжымына ыстық ықыласын білдірді.

Қарасын БАҚАЕВА,
Мемлекеттік тілдегі
кітапхананың кітапханашысы,
Рудный қаласы