Шоқтығы биік тұрар жазушы

Елімізде 2007 жылдан бастап, жыл сайын «Бір ел – бір кітап» акциясы өткізіледі. Үстіміздегі 2023 жыл халық жазушысы, белгілі драматург, қазақ прозасында өзінің ерекше қолтаңбасы бар жерлесіміз Төлен Әбдіковтың шығармашылығына арналған. 

Осы орайда «Южный» кітапхана-филиалында қабырғалы қаламгердің шығармашылығына арналған «Төлен Әбдіков – қазіргі қазақ прозасаның шебері» атты дөңгелек үстел өтті. Дөңгелек үстелге Қостанай жоғары педагогикалық колледжінің 2-курс студенттері және А.Байтұрсынұлы атындағы Қостанай өңірлік университетінің тілдер мен әдебиет теориясы кафедрасының қазақ тілі мен әдебиеті пәнінің оқытушысы, профессор К.Мырзағалиева, орыс тілі мен әдебиеті пәнінің оқытушысы К.Сегізбаева қатысты.

Шара қонақтары Т.Әбдіков шығармаларының тақырыбының өзектілігі мен маңыздылығына назар аударды. Негізгі талқыланған мәселе – Төлен Әбдіковтың қазіргі заманның өзекті мәселелерінің біріне арналған әйгілі «Оң қол» әңгімесін талқылау болды. Дөңгелек үстел барысында студенттер И.Артықбай және А.Мұратқызы «Қыз Бәтіш пен Ерсейіт» және «Оң қол» әңгімелері бойынша пікірлерімен бөлісті, қалған қатысушылар да талқыланып жатқан мәселе бойынша көзқарастарын білдіріп, бір-бірінің ұстанымдарын нақтылауға мүмкіндік алды.

Талқылау барысында студенттер өте маңызды дағдыға – жеке көзқарасын тұжырымдап, оны басқаларға жеткізе білуге үйренді. Іс-шара сонында белгілі прозашының шығармалары бойынша ұйымдастырылған «Дарындылар арасындағы дара талант» кітап көрмесі ұсынылып, жиналғандарға кеңінен таныстырылды.

Салтанат ИСКАКОВА,
«Южный» кітапхана-
филиалының қызметкері,
Қостанай қаласы