Скаут ұжымы ұстаздарға бас иеді

Выпуск - №50(497)   :   12.01.2022
107

ҚР Тәуелсіздігінің 30 жылдығына білім саласына үлес қосқан ардақты ұстаздарды еске алу, құрмет көрсету мақсатында Қостанай педагогикалық колледжінің скаут ұжымы Қостанай өңіріндегі ұстаздардың ескерткіш тақталарына саяхат жасады.

Скаут ұжымының жетекшісі Шагатаева Зауреш Жараспаевна ауа райының суығына қарамастан, бұл саяхатты есте қаларлықтай ұйымдастырды. Болашақ бастауыш білім беру және ағылшын тілінің мұғалімдері ретінде біз үшін бұл саяхат өте ерекше болды. Әр студент ұлы ұстаздардың өмірімен танысып, ескерткіш тақталарды зерттеді. Олардың ішінде: Шоқан Уәлиханов, Ахмет Байтұрсынұлы, Ғалихан Жантөрин, Зұлқарнай Алдамжар, Ғыждуан Қасымов, Нұрқан Жиентаев, Генрих Шек. Бұл тұлғалар білім саласында, ұстаздық жолдарында көп еңбек етіп, білім беруде бар күш-жігерлерін салған, өшпес із қалдырған ұлы тұлғалар.

Зиялылардың өмірімен танысу арқылы мамандығымызды дұрыс таңдағанымызға көзіміз жетті. Осы өткен саяхат барысында скаут ұжымы тек ұстаздарды, олардың өмірлері, жетістіктерімен танысып қана қоймай, саламатты өмір салтын ұстана отырып, «Скандинавиялық серуендеу» спорттық түрін скандинавиялық таяқшалар арқылы жүзеге асырды. Біз, скаут ұжымы білім саласында өшпес із қалдырған тұлғаларды еске ала отырып, спорттың белсенді түрін де жүзеге асырып, қоғамдағы адамдарға жақсы істерді дәріптей алдық деп сенеміз.

Скаут ұжымының қатысушысы Дархан Сатубалдинов: «Ұлы ұстаздары оқып-үйрену өте маңызды, себебі тарих жеке азаматтың өмірін саналы етеді. Егер адам өз елінің өткенін, ұлы адамдардың өмірі жайлы білмесе, еліміздің жарқын болашағын дамыта алмайды. Біздің болашақ мамандығымыз – ұстаздар, сондықтан өзіміздің ізашарларымыздың өмірбаяндарын, жетістіктерін, шығармаларын білуіміз өте маңызды. Өйткені, біз олардың жолын, қызметін жалғастырушылармыз және олар берген «эстафетаны» өзімізге қабыл алып, болашақ ұрпаққа жеткізушілерміз», – деп пікірімен бөлісті.

Мейлі сіз ғалым болыңыз, жұлдыз, тіпті беделді азамат, президент болып кетсеңіз де, сізді осы өмірге жетелеген, осы шыңға жетуге себепші болған ұстазды ұмытуға қақыңыз жоқ. Оның еңбегін сыйлау, оған құрмет көрсету – сол адамға деген сый-сияпат емес, сіздің тәрбиелі, тәлімді тұлға болғаныңыз. «Адамның адамшылдығы жақсы ұстаздан», – деп хәкім Абай айтпақшы, бастаған ісіміз нәтижелі болып жатса, оның артында ұстаздың бір тамшы болса да еңбегі барын есте сақтай отырып, білім саласына өлшеусіз үлес қосқан жандарды құрметпен еске аламыз.


Жаңылдық ЖҰМАБЕК,
Асем ТАЖИЕВА,
Қостанай педагогикалық
колледжінің М-21 тобының
студенттері, скаут
ұжымының мүшелері

Реклама