Тағылымға толы тартысты квест

Халықаралық «Қазақ тілі» қоғамының Рудный қалалық филиалы Қалалық тілдерді оқыту орталығымен бірлесе А.Байтұрсынұлының 150 жылдығы мен Абай күні аясында қазақ тілді емес мектептердің ұстаздары мен оқушылары арасында квест ойынын өткізді.

Мемлекеттiк тiлдiң мәртебесiн көтеру, оны үйренуге деген жастардың қызығушылығын арттыру мақсатындағы квест ойынының тәрбиелік мәні: патриоттық сезімді тәрбиелеу, қазақ жазушыларының, ағартушыларының шығармашылығын насихаттау; ұйымшылдық сезімін дамыту. Салтанатты іс-шараны тілдерді оқыту орталығының басшысы Жанна Джамбурчина жоспарымен таныстырып, барлық қауымды белсенді қатысуға шақырды. Тамыздың 10-ында аталып өтілетін Абай күні – Қазақстан Республикасының мерекелік күнтізбесіне енген күн. Іс-шараның ашылуында «Қазақ тілі» қоғамының Рудный қалалық филиалының төрайымы Қымбат Бірманова қатысушыларды Абай күнімен құттықтап, сәттілік тіледі.

Ойын барысында қатысушылар «Қазақтың бас ақыны», «Ұлт ұстазы Ахмет», «Қазақшаңыз қалай?», «Саналы ұрпақ» және «Руханият» атты тақырыптық аялдамалардан өтті. Әр аялдамада кездескен тапсырмалар жазушылардың өмірбаяны мен шығармашылығына, қазақ тілінің грамматикасына, қазақтың салт-дәстүрлеріне қатысты және ребус, сөзжұмбақтар шешу сияқты қызықты тапсырламалардан тұрды. Ойыншылар тілге қызығушылықтарын білдіріп, үлкен ықыласпен, белсене қатысты. Қазақ тілі пәнінен алған білімдерін ортаға сала отырып, сынға түсті. Өзара жауаптарын талқылап, дұрыс шешімге келу үшін уақыт та берілді.

Ойын барысында топ мүшелері жазушылардың өмір жолы мен ағартушылардың шығармалары, нақыл сөздері мен афоризмдер туралы мәлімет жинақтап, жақын танысты. Сонымен қатар Рудный қаласының тарихы мен жаңалықтарынан хабардар болды. Жалпы квест ойыны жоғары деңгейде өткізіліп, қатысқан ұстаздар мен оқушылар қазақ тілін жақсы менгергендерін көрсете білді. №3 мектептің 8-сынып оқушысы Даниил Гордеев Абайдың «Қырық мысал» аудармасынан «Қарға мен түлкі» мысалын нақышына келтіріп, жатқа оқып берді. Анастасия Дюмина №17, Надежда Гроздова №21 гимназия бастауыш сынып мұғалімдері, Екатерина Носенко №13 мектептің ағылшын тілі мұғалімі және Екатерина Селенина сұрақтарға толық жауап берді.

Ауқымды іс-шарамызды тілдерді оқыту орталығының басшысы Жанна Джамбурчина марапаттау рәсімімен аяқтады. Квест ойынның нәтижесінде жүлделі 1-орынға №5 мектеп-гимназиясының «Болашақ» командасы, 2-орынға №2 мектеп-гимназиясының «Білгірлер» командасы, ал 3-орынға №1 мектептің «Лидер» командасы ие болды. Сондай-ақ, ойын барысында өздерінің терең білімдерімен, шапшаңдығымен №21 мектеп-гимназиясының, №13 мектептің топ мүшелері, №4 мектеп-лицейінің, Дм.Карбышев атындағы №14 мектептің командалары ерекше көзге түсті.

Қалалық іс-шара ұйымдастырушылары №18, №19 жалпы білім беретін мектептерінің және Б.Майлин атындағы №7 мектеп-гимназиясының ұжымына ойын өткізуге ат салысқаны үшін алғыс білдірілді. Жеңімпаз топтар мақтау қағаздарымен және сыйлықтармен марапатталып, барлық топтарға «Абайдың қара сөздері» кітаптары табыс етілді. Демеушілік көрсеткен «Саналы ұрпақ» ҚҚ сыйлықтар табыс етті.

Гүлзада ШАЙМАРДАНҚЫЗЫ,
№18 ЖББМ қазақ тілі мен
әдебиеті пәнінің мұғалімі,
Рудный қаласы