Тарихи тұлғаға тағзым

Торғай топырағы қаншама текті ұрпақты дүниеге әкелген киелі мекен. Бұл дала Ыбрайдай кемеңгерді, Ахметтей көшбасшысын, Міржақыптай қайраткерді, Назипадай зиялыны түлеткен дархан дала.

Назипа Сегізбайқызы Құлжанова – қазақта қыздар арасында тұңғыш журналист, аудармашы, этнограф. Бір бойына осынша қабілетті тоғыстырған жерлесіміз, қазақтың қайсар қызының туғанына биыл 135 жыл. Мерейтой қарсаңында Арқалық қаласында жыл басынан бері іс-шаралар ұйымдастырылып, өткізіліп келеді. Сол шаралардың қорытындысы ретінде қазақ ұлтына еңбегі сіңген қайраткердің бюстін орнату қолға алынды.

Бюст «Тұлғалар мен оқиғалардағы мәдениет тарихы» арнайы жобасы бойынша жүзеге асырылуда. Оны «Арқалық қаласы әкімдігінің мәдениет және тілдерді дамыту бөлімі» ММ тапсырысымен Н.Құлжанова атындағы Торғай гуманитарлық колледжі жанынан құрылған «Жасампаз – жастар ұйымы» қоғамдық бірлестігі жүзеге асыруда. Ол үшін жұмысшы топ жасақталып, сәуір-мамыр айларында жұмыс жоспары құрылды.

Жұмыс және медиа жоспары жобаның техникалық сипаттамасына сәйкес жасалды. Бюсттің эскизі жасалып, өлшемдері (биіктігі, ені, көлемі) талқыланып бекітілді. Орнатылатын жері анықталды және бюстті жасау ісін Амангелді ауданынан «Аяла Асқар» ЖК Нұрбаев Жасұлан Асқарұлы және мүсінші Қожабеков Есенжол Таңатқанұлымен келісімшарт жасалды. Артынша Бюсттің нобайы талқыланып, құрылыс материалдарының сапасы мен қолжетімділігі, төзімділігі ескерілді.

Ескерткіш суға төзімді, керамикалық саз балшықтан әзірленіп, сыртқы қабаты жылтыр сырмен сырланатындығы талқыланды. Тұғыры мен іргетасы қызыл кірпіштен өріліп, сырты жылтыр қыш, құрылыс материалымен қапталады. Ескерткіштің жалпы өлшеміне келер болсақ, биіктігі – 1,30 см, ал ені – 80 см. Тұғырының биіктігі – 1,80 см, ені – 1 м. Ал іргетасының биіктігі – 0,45 м, ені – 1,85 см. Бүгінде жоба бойынша жұмыстың 90 пайызы орындалды. Енді бюстті әкеліп, орнату жұмысы күтілуде. Шараның ашылу салтанаты тамыз айының аяғына жоспарланып отыр.

Көрнекті ағартушы Нәзипа Құлжанованың бюстін орнату – ағартушының ұлт алдында жасаған еңбегіне деген ұрпағының, ұлтының құрметі, тарих алдында орын алған әділдік деп білеміз.

Гүлхашима ОРАЗОВА,
Арқалық қалалық
тілдерді оқыту орталығы
директорының міндетін
атқарушы