Тазалық – тіршілік кепілі

«Таза Қазақстан» ұлттық жобасы аясында Рудный қаласындағы «Достық» паркінде Мемлекеттік тілдегі кітапхананың ұйымдастыруымен «Таза болса табиғат, аман болар адамзат» атты паркке серуен өтті.

Қоғамда экологиялық сана-сезімді қалыптастырып, қоршаған ортаны таза ұстау, сонымен қоса ортақ жауапкершілікті арттыру және әр азаматтың туған жерінің көркеюіне үлес қосуға үндеу мақсатын көздеген іс-шараға «ETHNO LIFE» жазғы сауықтыру демалыс орнының оқушылары қатысты.

Табиғат – бізді қоршаған әсем әлем. Ол – көк аспан, шуақты күн, сыбдырлаған жапырақтар, мөлдір өзен, әсем гүлдер мен ну орман және ондағы жануарлар әлемі. Табиғат адамға таза ауа, тұщы су, қоректік тағам сыйлайды. Ағаштар мен бақтар көлеңке береді, құстардың әуезді үні көңіл-күйімізді көтереді. Сондықтан табиғатты аялау, оны қорғау – әрбір адамның парызы екені балаларға түсіндіріліп, кең көлемде мәлімет берілді.
Іс-шара барысында балалар табиғат аясында кітап оқып, ән шырқап, таза ауада серуендей жүріп, табиғат көріністерін қағаз бетіне түсірді. Сонымен қатар «Қызыл табан», «Кім тапқыр?» сияқты қызықты ойындар ойнатылып, жұмбақтар мен викториналық сұрақтар қойылды. Кітап көрмесі ұйымдастырылып, кітапханашы көрмеге шолу жасады. Белсенділік танытқан балаларға кішігірім сыйлықтар тарту етіліп, өнегелі іс-шара соңы естелік суретке түсумен аяқталды.

Айнаш АБЕНОВА,
Мемлекеттік тілдегі
кітапхананың кітапханашысы,
Рудный қаласы