«Тіл – достықтың тірегі»

Осындай атаумен қаламыздағы «Дорожный» кітапхана-филиалы Тіл мерекесіне сәйкес тақырыптық сөре ұйымдастырды. «Тіл» ұғымы қай ұлтта, қай елде болмасын қастерлі, құрметті саналады емес пе.

Адам болып жаралғаннан бері жан дүниесінің айнасы, өсіп, өніп, түрлене беретін, мәңгі құламайтын бәйтерегі – ана тілі. Ол жүректің терең сырларын, халық тарихының барлық кезеңдерін, жанның барлық толқындарын ұрпақтан-ұрпаққа сақтап отыратын қазына. Ол әрбір адамға ана сүтімен бірге бойға сіңіп, қалыптасады.

«Ана тілі – бәріміздің анамыз, өйткені ол – ұлтымыздың анасы», – деген еді Елбасы Н.Назарбаев. Қазақ тілі – халқымыздың рухани байлығы, ұрпақтан-ұрпаққа мирас болып қалған таусылмас қазына. Ана тіліміздің қадір-қасиеті туралы қанша айтсақ та таусылмайды. Бабадан ұрпаққа аманат болған ана тілін көздің қарашығындай қорғап, оның тазалығына мəн беруіміз керек. Орыстың ұлы жазушыларының бірі К.Г. Паустовский: «Туған тіліне жаны ашымаған адам – жəндік», – деген болатын. Сондықтан да ана тіліне қорған болу əрқайсымыздың қастерлі борышымыз.

Сондықтан да Тіл мерекесіне орай тақырыптық сөрені ұйымдастыру арқылы кітапханашылар «Гаи» шағын ауданы тұрғындарының ана тілге деген құрмет сезімін арттыру, тіл мәртебесін көтеру, таза сөйлеуге үйрету, өз ұлтына, еліне деген сүйіспеншілігін ояту мақсатын көздеді. Кітапхана қызметкерлері қала тұрғындарына көптеген кітаптар көрсетіп, қызықты мағлұматтар берді. Шара соңында барлық тұрғындарды «Дорожный» кітапхана-филиалына кітап, журналдар алып оқуға шақырды.

Эльмира МИРЗАЛИЕВА,
«Дорожный» кітапхана-
филиалының кітапханашысы,
Қостанай қаласы