Тілге құрмет – елге құрмет

Выпуск - №20(517) : 20.05.2022

463

Соңғы уақытта мемлекеттік тілді дамыту жұмыстары кеңінен қолға алынуда. Әсіресе қоғамдық өкілдер белсенділік танытып, ауқымды іс-шаралар жоспарланып, кейбірінің оңтайлы жүзеге асырылып жатқандығына да куә болудамыз.

Сөзіме дәлел, үстіміздегі жылдан еліміздің барлық өңірлерінде Халықаралық «Қазақ тілі» қоғамының филиалдары ашыла бастады. Бұл игі бастамаға Рудный қалалық тілдерді оқыту орталығы да үн қосты. Жақында ғана Рудный қалалық тілдерді оқыту орталығы қабырғасында аталмыш қоғамдық бірлестіктің Рудный қалалық филиалының алғашқы отырысы өткізілді. Оған әкімдіктің мәдениет, тілдерді дамыту, ішкі саясат бөлімдерінің өкілдері мен қоғам мүшелері қатысты. Басқосуда қоғамдық бірлестік мүшелерінің міндеттері айтылып, жұмыс бағыты айқындалды.

Қоғамдық бірлестік филиалының төрайымы болып тіл жанашыры, Б.Майлин атындағы №7 мектеп-гимназиясының директоры, қалалық мәслихат депутаты Қымбат Бірманова сайланды. Ол өзіне тапсырылған сенімге үлкен жауапкершілікпен қарайтынын тілге тиек етіп, бірлестік мүшелеріне «Қазақ тілі» қоғамының Қостанай облыстық филиалының 2022 жылға арналған жұмыс жоспарымен таныстырды. Әрі қарай бірлестік отырысы қоғам белсенділерінің мемлекеттік тілдің бүгіні мен ертеңі жайлы ойларын ортаға салып, талқылауымен жалғасын тапты. Болашаққа айқын мақсат-міндеттер нақтыланып, жұмыс жоспары жасалды.

Индира ЖАЙЛАУБАЕВА,
Халықаралық «Қазақ
тілі» қоғамының
Рудный қаласындағы
филиалының мүшесі