Ұлттың ұлағатты ұстазы

Биыл еліміз қазақ халқының біртуар перзенті Ахмет Байтұрсынұлының 150 жылдық мерейтойын атап өтуде. Оның бүкіл еңбегінің мәнін бір ауыз сөзбен айту мүмкін болмас. Дегенмен есімі үлкен әріптермен жазылатын ұстаздардың алдыңғы қатырында екені хақ.

Ұлағатты ұстаз Ахмет Байтұрсынұлының 150 жылдығына орай келер ұрпаққа үлгі ретінде құрмет көрсетіліп, қаламыздағы ескерткіш-бюстіне гүл шоқтары қойылды. Арқалық қаласының әкімі Әмірхан Біркенұлы жиналған қала тұрғындарына, зиялы қауым өкілдеріне жылы лебізін білдіріп, өз сөзінде Ахмет Байтұрсынұлының өмір жолынан деректерді келтіріп, жасаған игі істерін тілге тиек етті. Артынша қала мекемелері атынан арнайы гүл шоқтары дайындалып, құрмет көрсету рәсімі өткізілді.

Дарынды ақын, аудармашы Ахмет Байтұрсынұлының есімі бүгінде жас ұрпақтың жүрегінде жатталып, мәңгі есте қалады. Ұлтымыздың ұстазы қазақ халқы үшін қызмет етуді өмірлік мұрат тұтқан, ал артында қалған мұралары егемен еліміздің халқы үшін қоғамдық тәрбие беруде айрықша маңызға ие екені сөзсіз. Халық өмірінің сан-саласына араласып, көзқарасын ашық білдірген қоғам қайраткері, ірі тұлға, ақын, әдебиеттанушы, ағартушы-ғалым, ұлт ұстазының Қостанай облысының Жангелдин ауданына қарасты Сарытүбек аулынан шыққан жерлесіміз болғанын мақтан тұтамыз.

Асем ДҮЙСЕНБИНА,
«Алпамыс» бөбекжайының
музыкалық жетекшісі,
Арқалық қаласы