Ұстаздықпен өмірін өрнектеген

Саналы ғұмырын білім беру ісіне арнаған ардағы ұстаздарымыз аз емес. Осы тұста елімізде қыркүйек айының соңғы жексенбісінде атап өтілетін Еңбек күніне орай, Жангелдин орта мектебінде «Мамандық үздігі» тақырыбында кездесу өтті.

Басқосуға мектебімізде адал еңбек етіп, құрметті демалысқа шыққан мамандықтарының үздігі – математика пәнінің мұғалімі Искакова Гүлбану Исламбекқызы, тарих пәнінің мұғалімі Искакова Гүлжан Исламбекқызы, қазақ тілі мен әдебиеті пәнінің мұғалімі Искакова Үкіжан Исламбекқызы және технология пәнінің мұғалімі Диханбай Мәлік Мырзакеленұлы шықырылды. Кездесу мектеп бітіргелі отырған 10-11 сынып оқушыларымен ұйымдастырылды. Оқушылар ардагер ұстаздардан мамандықтарының қыр-сырларын сұрап, мамандыққа қалай келгендерін, осы жолда бастарынан кешкен қызықты сәттерін сұрап, сұхбаттасты.
Ардагер ұстаздарымыз оқушыларға еңбек жолында болған қиын да қызықты сәттерімен бөлісті. Сонымен қатар жылдар бойы атқарған жұмыстарын айтып, ұстаздық еткен уақытын естеріне түсіріп, бір марқайып қалды. Ардақты қонақтарымыз оқушыларға ұстаздық мамандықты таңдағандарына ешуақытта өкінбегендерін айтып, мамандық таңдағанда жүрек үніне құлақ асып, өздеріңнің жандарыңа жақын болар іспен айналысуға, сол бағытта қозғалуға кеңес берді. Кездесу шағын концерттік бағдарламаға ұласты. Мектебіміздің 6-сынып оқушылары күй тартып, 7-сынып оқушылары әсем әуен шырқап, мағыналы көркем сөз оқыды. Тағылымды басқосу мектеп оқушыларының ардагер ұстаздарымызбен естелік суретке түсуімен аяқталды.

Қарлығаш УТЕБАЕВА,
Жангелдин ОМ тәлімгері,
Жангелдин ауданы,
Аралбай ауылы