Жақсылық жаршысы болған еріктілер

Еріктілік қызмет аясында Айсары жалпы білім беретін мектебінің оқушылары ауылда тұратын қарт адамға көмек көрсетті. Қыс мезгілінде қалың қар жауып, жүріп-тұру мен тұрмыстық шаруаларды атқару қиындайтын кезеңде мұндай қолдаудың маңызы ерекше.

Айсары жалпы білім беретін мектебінің еріктілер тобы Бибарыс Жарасланұлы, Диана Фазыл, Рауан Умаров, Алтын Сәт, Гүлімжан Мусаева, Гүлназ Төлемісова, Санжар Қайдар, Рамазан Молдаш және Камила Ибраш сынды оқушылардан құралған. Олар ауыл тұрғыны Тілеужамал әженің үйіне барып, кіреберіс жолды, шаруашылық құрылыстарына апаратын соқпақтарды, сондай-ақ есік алдындағы аумақты қардан тазалады. Осылайша белсенді жастарымыз бірлесе еңбек етіп, жауапкершілік пен еңбекқорлықтың, үлкенге деген шынайы қамқорлықтың жарқын үлгісін көрсетті.
Өз кезегінде Тілеужамал әже көрсетілген көмек, ықылас пен мейірімділік үшін оқушыларға шынайы алғысын білдіріп, батасын берді. Мұндай игі істер көмекке мұқтаж жандарға қолдау көрсетіп қана қоймай, оқушылардың бойында мейірімділік, қарттарға құрмет және белсенді азаматтық ұстанымды қалыптастырады. Айсары жалпы білім беретін мектебі оқушыларының еріктілік қызметі алдағы уақытта да жалғасын тауып, ауылда өзара көмек пен игі істер дәстүрін нығайта түспек.

Саркын АБЕНОВА,
Айсары жалпы білім
беретін мектебінің
еріктілер тобының жетекшісі,
Қостанай ауданы