Жастардың экологияға үлесі

Қостанайдағы НЗМ оқушылары Нұрдәулет Игенов, Нұрай Ержан, Әмірәлі Избаир химия пәнінің мұғалімі Гүлмира Конспаеваның жетекшілігімен CaspianStart-Up 2024 республикалық байқауының финалына қатысты.

Кәсіпкерлік дағдыларды дамытуға, стартап жобаларды әдістемелік қолдау мен ынталандыруға бағытталған байқау Ақтау қаласындағы НЗМ-де өтті. Биыл байқаудың бағыты: «Экологиялық мәселелерді шешудің инновациялық идеялары» болды, сондықтан біздің команда жұмысының басты мақсаты – қалдықтарды азайту және қоршаған ортаны қорғауға үлес қосу.
– Біздің жоба бүліне бастаған көкөністер мен жемістерді сатуға бағытталған. Сонымен қатар, осы өнімдерден органикалық компост өндірумен айналысамыз. Осылайша, тамақ қалдықтарын азайтуға көмектесеміз және химиялық тыңайтқыштарға экологиялық таза балама жасаймыз, – дейді қатысушылар өздерінің стартаптары туралы.
Байқау қорытындысы бойынша Нұрдәулет, Нұрай және Әмірәлі Қазақстан-Британ техникалық университетінде оқуға 100% білім грантын жеңіп алды.

Қостанайдағы ФМБ НЗМ баспасөз қызметі