Жылдың үздік оқытушысы анықталды

Қостанай облысы әкімдігінің тілдерді дамыту басқармасы мамыр айының 4-і мен 14-і күндері аралығында Ахмет Байтұрсынов атындағы оқытушылар арасында онлайн түрде «Үздік оқытушы-2020» облыстық байқауын өткізді.

Байқауға 13 оқытушы қатысты. Байқау 4 кезеңнен тұрды. Бірінші «Жарнама» (PR) кезеңінде қатысушылар 15 минуттан аспайтын бейнесабақ үлгісін дайындап, онлайн дауыс жинады. Екінші кезеңде Ахмет Байтұрсынұлының өмір жолы, қызметі мен шығармашылығы қамтылған тест тапсырмаларын орындады. Үшінші кезең – Ахмет Байтұрсынұлының шығармашылығы, әдістері мен әдістемелік мақалалары, сондай-ақ оқытудағы түрлі педагогикалық-психологиялық жағдаяттарға байланысты видеосұрақтарға жауап берді. Төртінші кезең – қатысушылар өздерінің соңғы жылы шыққан оқулық, оқу-әдістемелік құралдарын, ғылыми-әдістемелік мақалаларын, байқаудағы жүлделі жетістіктерін көрсетті.

Байқау қорытындысы бойынша І орынға Сарыкөл ауданы тілдерді оқыту орталығының оқытушысы Нәби Болат, ІІ орынға Арқалық қаласы әкімдігінің қалалық тілдерді оқыту орталығының оқытушысы Балайм Молдабекова, ІІІ орынға «Тілдарын» облыстық тілдерді оқыту орталығының оқытушысы Айнұр Миркемелова ие болды. Одан бөлек «Шығармашыл педагог» аталымы бойынша Меңдіқара ауданы тілдерді оқыту орталығының оқытушысы Анар Хасенова, «Креативті педагог» аталымы бойынша Қарабалық ауданы тілдерді оқыту орталығының оқытушысы Ерлан Абилов, «Жаңашыл педагог» аталымы бойынша Денисов ауданы тілдерді оқыту орталығының оқытушысы Алия Сабитова марапатталды.

Жүлделі орындар мен арнайы аталым иегерлері дипломмен және «Sulpak» электрондық-техникалық дүкенінің сыйлық сертификатымен марапатталса, қалған қатысушыларға Алғыс хаттар табысталды.

Бахытгүл ЗАРЛЫҚҚЫЗЫ,
Қостанай облысы әкімдігінің
тілдерді дамыту басқармасының
бөлім басшысы