Абай мұрасын насихаттаған

Н.Құлжанова атындағы Торғай гуманитарлық колледжінің ұйымдастыруымен Абай Құнанбаевтың 175 жылдық мерейтойына арналған «Абай оқулары» қалалық қашықтан өткізілген байқауына балабақша бүлдіршіндері қатысты.

Мемлекет басшысы Қасым-Жомарт Тоқаев ақын Абай Құнанбайұлының 175 жылдық мерейтойын ХХІ ғасырға қарыштап қадам басқан тәуелсіз Қазақстанның бүгінгі саяси, экономикалық және мәдени жетістіктері аясында атап өту туралы шешім қабылдағаны жұртшылыққа жақсы мәлім. Соған орай былтырдан бері бірталай шаралар өткізіліп келеді, әлі де жалғаса бермек. Бұл Елбасының «Болашаққа бағдар: рухани жаңғыру», «Ұлы даланың жеті қыры» атты мақалалары аясында қойылған мақсаттарды жүзеге асырудың заңды жалғасы және Абай мұрасын заман сұраныстарына сай қайта зерделеудің маңыздылығын білдіреді.
Аталмыш оқуларды өткізудің мақсаты – Абай мұрасын кеңінен насихаттау, дарынды жас ақындарды тәрбиелеп, бойына рухани адамгершілік, имандылық қасиеттерін қалыптастыру. Байқаудық нәтижесі бойынша Абайдың «Көзімнің қарасы» өлеңін үш тілде орындап шыққан «Ақбота» балабақшасының бүлдіршіндері жүлделі орынға ие болды. Олардың дайындығына ат салысқан меңгеруші М.Нұралина, әдіскер А.Мырзакерімова, педагогтер С.Кенжебекова, С.Хасенова, К.Сарманова, музыка жетекшісі А.Әбдрахман Алғыс хаттармен марапатталды. Н.Құлжанова атындағы Торғай гуманитарлық колледжінің ұжымымен жас ұрпақты тәрбиелеу мен оқытудағы еңбегіміз жалғасын таба берсін демекпін.

Ақбота ӘБДРАХМАН,
«Ақбота» балабақшасы
музыка жетекшісі,
Арқалық қаласы