Адамзаттың алып тұлғасы

Қазақ халқының басындағы мәңгі өшпес жарық жұлдызы Абай Құнанбаевтың биыл 175 жылдығы. Арқалық қаласындағы №10 ЖОББМ орыс тілде оқытылатын 1-4 сыныптарда «Әлемнің Абайы» атты сайыс сабағы өткізілді.

Абай – қазақтың ұлттық философиясының негізін салушы, жаратылыстың құпиясына, табиғат пен қоғамның, адам мен заманның сырына терең бойлаған кемеңгер ойшыл. Ақын ел арасында болатын көптеген жағымсыз әрекеттер: іштарлық, көрсеқызарлық, сондай-ақ көреалмаушылық, еріншектік, жалқаулық сияқты теріс қылықтардан аулақ болуға үндеп, ұрпаққа үлгі көрсетпек түгілі қарақан басын әрең алып жүрген халықтың берекесіз тірлігін күні бұрын көріп тұрғандай ашық та айқын суреттеп, тереңнен баяндаған. Абай қазақ қоғамын ерінбей еңбек етуге шақырды. Кедейшіліктен құтылудың бір тәсілі – егіншілікпен айналысу, қолөнер кәсібін және сауда-саттық жасауды үйрену екенін айтты.

Дана ақынның шығармашылығы мен өмір жолын, рухани асыл мұраларын насихаттау мақсатындағы сайыс барысында оқушылар Абайдың өлеңдерін мәнерлеп оқып, әндерін шырқады. Оқушыларды көркем сөйлеуге, шығармашылықпен жұмыс істеуге көмектесуді көздеген сайыс «Абай атамыздың өлеңдерін жаттап айту», «Сұрақ-жауап», «Тапқыр болсаң, тауып көр», «Сөз тапқанға қолқа жоқ», «Білгірлер», «Абай атамыз кім?» деген 6 кезеңнен тұрды.

Сайыстың әр кезеңдерінің өзіндік қиындықтарымен қатар қызығы да болды. Қатысушылар жауаптарын екі тілде айтты. Сайыстың қорытындысына әділ қазылар кеңінен тоқталып, жақсы ат салысқан қолдаушы топтар мен жеңімпаздарды марапаттады. Мәңгі жасыл нәрлі мұраның асылын қанып ішіп, өміріне қажетті дүниелерді бойына жия білген әрбір жас ұрпақ нұрлы да шуақты болашақтың иесі боларына кәміл сенемін.

Салтанат ЕРТАЙ,
№10 ЖББОМ қазақ тілі
мен әдебиеті пәнінің мұғалімі,