Әке көрген – оқ жонар

Абай негізгі орта мектебінде «Әке көрген – оқ жонар» атты сайысымыз өтті. Қоғамда әкенің рөлін арттыру мақсатында «Біртұтас тәрбие» бағдарламасы аясында ұйымдастырылған шараға көпшілікке үлгілі ісімен танылып жүрген әкелер қатысты.

«Әке – асқар тау» дейді халқымыз. Қазақ отбасында әкенің орны, құрметі ерекше. Әке – сол шаңырақтың ұйытқысы, қамқоршысы, тірегі. Сондықтан, оған үлкен құрметпен қарау баланың парызы болмақ. Баланың бойындағы кез келген жақсылы-жаманды қасиетті байқаса, қазақ оны ең бірінші әке мен ата тәрбиесінен көреді, тегіне тартқан дейтіні тегін болмаса керек-ті. Іс-шараның негізгі мақсаты – әке мен бала арасындағы қарым-қатынасты жақсартуға, бала тәрбиелеудегі оның рөлінің маңыздылығын арттыруға, бала үшін қауіпсіз ортаны құру және қолдау, отбасылық құндылықтарды сақтау және нығайтуға бағытталған.

Тәрбиенің қалыптасқан құнды тәжірибесіне сүйене отырып, XXI ғасыр отбасы мүшелерінің бойына рухани-адамгершілік, ата салт-дәстүріндегі тәрбиелік құндылықтарды сіңіру, бірлігі мен ынтымақтастығын нығайту, бір-бірін сыйлау, адамгершілік құндылықтарын қалыптастыруды көздеген байқауға әке мен баладан құралған 4 жұп қатысты. Сайысымыз 5 кезеңнен құралды: «Жеті атасын білген ер, жеті жұрттың қамын жер»; «Ата мұраң – асыл қазынаң»; «Әке көрген – оқ жонар»; «Халық тәлім-тәрбие бастауы»; «Жүйріктен жүйрік озар жарысқанда». Әрбір кезең 5 баллдық шкаламен бағаланып отырды.

Әкелер мен балалар белсенді қатысып, әрбір кезеңнен сүрінбей өтті. Әділ қазылар алқасының шешімімен жүлделі 1-орынға 7 «А» сынып оқушысы Ақан Сартон мен әкесі Дүйсенбек Алпысбаев ие болды. Ал, екінші орынды 5 «А» сынып оқушысы Бағнұр Әубәкір мен әкесі Манас Байкадамов иеленді. Үшінші орынды 6 «А» сынып оқушысы Сәтдәулет Әуелбек пен сынып жетекшісі Ақиық Хайрат және де 7 «Б» сынып оқушысы Саян Серикбаев пен сынып жетекшісі Бақытбек Санарбаевпен теңдей бөлісті.

Назым АЛПЫСБАЕВА,
Абай негізгі орта мектебі
директорының тәрбие ісі
жөніндегі орынбасары,
Қостанай ауданы