2025 жылға дейін тағы 1000 мектепті жаңғыртудан өткізу жоспарлануда. Айта кету керек, бұл бастама Мемлекет басшысының сайлауалды бағдарламасы аясында жүзеге асырылуда. Модернизация қала және ауыл мектептері арасындағы алшақтықты азайтуға, сондай-ақ балаларға білім мен тәрбие беру үшін жайлы жағдай жасауға, материалдық-техникалық базаны күшейтуге бағытталған.
Атап айтқанда, ол мектептерге ағымдағы және күрделі жөндеу жұмыстарын жүргізу, пәндік кабинеттер сатып алу (химия, физика, биология, STEM, роботехника және басқалары), мектеп жиһаздарын жаңарту, асхана, кітапхана бөлмелерін жаңғырту, сондай-ақ мектепте қауіпсіздік жағдайларын жақсартуды қамтиды.
Осы ретте 2024-2025 оқу жылы жеті жүз он екі мектепте ағымдағы және күрделі жөндеу жұмыстары жүргізіледі, 532 мектепке бір мыңға жуық пәндік кабинет сатып алынады, бес жүз жетпіс төрт білім беру ұйымындағы жиһаздар қайта жаңартылады, 481 мектепте асхана, жеті жүз елу жеті ағарту ошағындағы кітапхана жаңғыртылады. Бұл жұмыстардың нәтижесінде 366 мың оқушы үшін білім алу жағдайының жақсаратындығы болжануда.
ҚР Оқу-ағарту министрлігінің баспасөз қызметі