Армандарға толы ертегілік кеш

Қостанай қаласының әкімі Марат Жүндібаевтың қатысуымен қалалық балалар шығармашылығы мектебінде дәстүрлі Жаңа жыл шыршасы ұйымдастырылды. Ертегілік кеш қала мектептерінде оқитын 9-13 жастағы 200-ге жуық оқушының басын қосты.

Жаңа жылдың негізгі атрибуты – әсем безендірілген шыршаның жанында өрбіген «Жаңа жылды құтқарайық» атты таңғажайып ертегілік қойылым балаларды өз сиқырымен баурап алды. Қойылымды облыстық қуыршақ театрының және қалалық балалар шығармашылығы мектебінің театр студиясының әртістері бірлесе дайындаған. Оқиға желісі қызықты әрі әсерлі болғаны соншалық, жас көрермендер өздерін ертегі әлемінде жүргендей сезінді.

Мерекелік іс-шарада өткен Ұлу жылы мен келе жатқан Жылан жылының кейіпкерлері сахна төрінде жарқырай көрінді. Тіпті, мифологиялық кейіпкерлер мен батырлар да ортаға шығып, балаларды оқиға желісіне елітіп әкетті. Артынша көпшілікке жақсы таныс мультфильм кейіпкерлерімен бірге ән айтып, би билеген бүлдіршіндердің жүзінен шаттық пен қуаныштың нұры төгілді.

Кештің көркін арттырған ертегі әлемінің басты кейіпкерлері – Аяз ата мен Ақшақар болды. Олар әр балаға денсаулық, қуаныш және алдағы жылы жарқын жетістіктер тіледі. Ал, биылғы қаламыздың 145 жылдығына орай, Жаңа жыл шыршасының ұйымдастырушылары тарапынан балалар сыйқырлы сандықтан 145 ізгі тілектер жазылған билеттерді алды. Осылайша, шыршаның айналасы шат-шадыман күлкіге толып, балалар көтеріңкі көңілмен тарқасты.

Жамал ШАУКЕН,
суретті түсірген автор