Қарттарым – асыл қазынам

Қазан айының 1-і – Халықаралық қарттар күні. Үлкенді сыйлау, қарияны құрметтеу – қазақ халқының ата салты екені белгілі. Осы орайда Б.Қолдасбаев атындағы жалпы білім беретін мектебінде мақала тақырыбымен аттас мерекелік іс-шара өтті.

Іс-шара оқушылардың бойына халқымыздың қадір-қасиетін сіңіру, үлкенді сыйлай білуге, өз ата-бабасын ұмытпай, есте сақтауға және аталы сөзден ғибрат алуға тәрбиелеу мақсатында ұйымдастырылған. Атаулы шараға білім ордасында ұзақ жылдар бойы қызмет еткен зейнеткер ұстаздар қауымы арнайы шақыртылды. Келген қонақтарға оқушылардың арнайы әзірлеген мерекелік бағдарламасы ұсынылды.

Жас өнерпаздар тақырыпқа сай ән шырқап, би билеп, көркем сөз оқыды. Қадірлі қонақтарымыз оқушылардың өнерлерін тамашалап, мектеп ұжымына көрсетілген құрметі үшін алғыс білдірді. Мектеп басшысы Мұхаммедәлі Серікұлы, өз кезегінде, ұжым атынан арнайы құттықтаулар мен гүл шоқтарын табыстады. Артынша зейнеткер, ұлағатты ұстаз Абай Кәрімұлы оқушыларымызға игі тілегін жаударып, ризашылығын жеткізді.

Әнет ЖҰМАБЕК,
Қолдасбаев ЖББМ
көркемдік жетекші,
Амангелді ауданы