Ауызбіршілікке тәрбиелейтін ойын

2022-2023 оқу жылы Рудный қаласының мұғалімдері үшін қызықты әрі тартысты іс-шарамен басталды деуге болады. №15 жалпы білім беретін орта мектебі сайысшылар үшін есігін айқара ашты.

Ахмет Байтұрсынұлының 150 жылдығына орай волейболдан Рудный қаласы әкімінің кубогына турнир ұйымдастырылды. Сайысқа Рудный қаласы және Қашар кентімен бірге 17 мектеп мұғалімдерінен құралған командалар қатысты. Сайыс ережесі бойынша командалар өзара 4 командадан топ құрап, сол топта жеңіске жеткен команда жартылай финалға жолдама алуы керек еді. №13 жалпы білім беретін мектеп құрамасы топқа №3, №11, №18 мектеп командаларымен түсті. Сол топта барлық командаларды жеңіп, жартылай финалға жол жартты. Жартылай финалда №2 Қашар орта мектебімен қызықты да тартысты ойын өткізіп, жеңісті иемденді.

Сайыстың шешуші кезеңі №15 мектеп қабырғасында өткізілуі керек болатын. Финалда №7 мектеп-гимназия мен №13 орта мектебі 1-орын және 2-орынды өзара бөлісуге бақ сынады. №7 мектеп-гимназия есепте азғантай алдыға шығып, жеңімпаз атанды. Ал біздің команда жүлделі күміс алқа иегері атанды. Жүлделі 3-орынды №1 Қашар орта мектебі қанжығасына байлады. Команда мүшесі Игорь Щербаков әкім қолынан «Үздік қорғаушы» мадақтамасын алды. Ойын басынан соңына дейін қолдау көрсетіп, жанкүйер болған мектеп директоры Шынар Валиева мен мектебіміздің мұғалімдеріне айтар алғысымыз шексіз. Алда әлі талай жеңістерге жетеміз деген ойдамыз.

Сабина ОСПАНОВА,
№13 ЖББМ ағылшын
тілі пәнінің мұғалімі,
Рудный қаласы