Әжемнің ертегісі – тәрбиенің бастауы

Мичурин жалпы білім беретін мектебінде қазақ бастауыш сыныптар арасында «Біртұтас тәрбие» бағдарламасы аясында ұлттық құндылықты дәріптеу мақсатында «Әжемнің еретегісі» атты сыныптан тыс іс-шара өткізілді.

Ұлттық тәлім-тәрбиенің, яғни халықтың сан ғасырлық тәлімінің ұрпақ тәрбиелеудегі алатын орны ерекше. «Жан тұрмысы өркендеу үшін, яғни ойы, ақылы кеңейіп, құлқы түзеліп, тілі баю үшін жас балаға ертегі тым қымбат нәрсе», – деп Мағжан Жұмабаев айтып кеткендей, ертегінің бала тәрбиелеу ісінде алар орны ерекше. Сондықтан да, ертегі мазмұнының негізгі бағыты «жаманнан жиреніп, жақсыдан үйренуді» насихаттауға бағытталды.

Оқушыларға ертегілер ауыз әдебиетінің ең көне жанрына жататындығын түсіндіре отырып, ойын ойнату арқылы ертегілер жайлы қызықты суретті сұрақтар қойылды. Аталмыш іс-шараға мектептің 1 «Ә» сыныбының ата-аналары мен оқушылары белсене қатысты. Төлепбергенқызы Күлпаш әжей балаларға «Жақсылыққа жақсылық» ертегісін баяндап, түсінгендігін сұрақтармен тексерді. Ал, 1-сынып ата-аналары «Жамандық неден болады?» еретегісін сахналаса, 1-сынып оқушылары «Бауырсақ» еретегісін қуыршақтардың көмегімен сахналады. Олар қуыршақтарды қолға киіп, қимылға келтіріп, жақсы ойын көрсете білді.

Тәрбиесі мол іс-шара ұлттық кимешек киген әжелеріміздің «Әжемнің шеберханасы» атты бөлімде өзінің қолөнер шеберлігін көрсетуімен жалғасын тапты. Жас буынға тәрбие жұмысын салт-дәстүрімізді сабақтастыра отырып, әжелеріміз кілем тоқу, құрақ құрау, жіп иірудің өзіндік тарихы мен маңызын айтып, көрсетті. Танымдық тәрбиелік іс-шарада дастархан жайылып, әжелерімізден бата алдық. Сыныптан тыс іс-шара музыкалық әуенге ұласты.

Ханзада ТУЛЕКИНА,
Мичурин ЖББ мектебінің бастауыш сынып мұғалімі,
Қостанай ауданы