Бабамыздың көзіндей мұра

Қазақ халқының рухани байлығын бала бойына сіңіру домбырадан басталады. Қостанай қаласындағы №10 ОМ «Киелі Домбыра» үйірмесіне жетекшілік етіп келе жатқаныма биыл 11 жыл.

Осы уақыт ішінде көптеген шәкірт тәрбиелеп, ата-бабамыздың бізге қалдырған мол қазынасын жастардың санасына құйып, көптеген ұлы композиторлардың шығармаларын үйретіп келемін. «Киелі домбыра» үйірмесінде оқушылардың жас ерекшеліктеріне байланысты құрылған «Жас толқын», «Домбыра Дастан», «Жастар», «Қос қанат» сынды бірнеше ансамбльдер бар. Олардың барлығы да көптеген байқаулардың жеңімпаздары.

2015 жылдан бастап өткізіліп келе жатқан қалалық «Алтын домбыра» байқауында біздің оқушылар жеке және топпен орындаушылықтан жылда жүлделі орындарға ие болып жүр. Сондай-ақ қалалық «Ғасырлар үні», республикалық «Ақжелең», «Жұлдызды Олимп», халықаралық «Таңғы шұғыла», «Звезды Мира», «Звезда удачи», «Золотая Россыпь» секілді көптеген байқауларға қатысып, бірнеше дүркін Гран-При, 1, 2, 3-орындармен қанжығасын майлап келеді.

Олардың ішінде жеке орындаушылықтан жылдар бойы бірнеше рет жүлделі орын алған 11-сынып оқушысы Аяжан Алтайқызы, 5-сынып оқушысы Жібек Әлиева және 4-сынып оқушысы Томирис Амангелдіні атап өтуге болады. «Мектеп ұстаздар әлемі» шығармашылық орталығының Абай атамыздың 175 жылдығына орай сырттай өткізген «Абай-175» республикалық балалалар шығармашылық бауқауына қатысып, Жібек Әлиева 1-орынға, Томирис Амангелді 2-орынға ие болды.  

Жетістіктерімен көзге түсіп жүрген өнерлі жас домбырашылар осындай марапаттарға толы шығармашылық жол үстінде келеді. Бұның бәрі, әрине еңбектің арқасы. «Еңбек – ырыстың бұлағы, бақыттың шырағы» дегендей, дарынды шәкірттеріммен әлі талай биікті бағындаратыныма сенемін. «Ақырын жүріп, анық бас, еңбегің кетпес далаға», – деп Абай айтқандай, көп еңбекті қажет ететін ұстаздық жолдың үлкен нәтижесі болары хақ.

Айнұр ӘБІШЕВА,
№10 ОМ «Киелі домбыра»
үйірмесінің жетекшісі,
Қостанай қаласы