Балаларға қуаныш сыйлау

Жаңа жыл мерекесінде Айсары ауылының бетке ұстар азаматтарының демеушілігімен 1–11-сынып оқушыларына және мектепалды даярлық тобы мен «Балапан» шағын орталық тәрбиеленушілеріне сыйлықтар дайындалды.

Жаңа жыл – әр үйде асыға күтетін, оған ұзақ және мұқият дайындалатын барлық балалар мен ересектердің көптен күткен сүйікті мерекесі. Әр баланың жүзіне шаттық пен қуаныш сыйлау – сауапты істің бірі екеніне ешкім шүбә келтіре қоймас. Айсары жалпы білім беретін мектебінің әкімшілігі Қостанай ауданына қарасты Айсары ауылдық округінің әкімі Б.Нургазинге отбасылық жағдайы төмен оқушыларға және көпбалалы отбасынан шыққан оқушыларға тәтті сыйлықтар ұйымдастыруын сұрағанымызда – қолымызды қайтармай, демеуші тауып, әр оқушыға 3 мың теңге тұратын 35 тәтті сыйлық табыстады.

Ал, мерекенің ажырамас атрибуты – жаңа жылдық безендірулер – мерекені барынша сезінуге ықпал етеді. Сондықтан бұл жылы да мектепті безендіру ісіне үлкен көңіл бөлініп, мерекелік көңіл-күй біздің сүйікті мектебімізге қоныстанды. Бұл сыныптардың дәстүрлі безендірілуінен, фойеден және жаңа жылдық мерекелерге арналған акт залынан басталды. Мерекеге орай «Жаңа жылдық ертегі» фотоаймағы әзірленді. Әрине, мерекені өткізу ісіне жасалған ата-аналардың қолдауын ерекше атап өтсек ләзім. Бастысы, балалар риза болды, бұл – басты мақсатымыз еді.

Жанагуль ЖУМАБАЕВА,
Айсары ЖББМ
әлеуметтік педагогі,
Қостанай ауданы