Бес табан бәсекесінде үздіктер анықталды

Арқалық қаласы білім бөлімінің ұйымдастыруымен қала және ауыл мектептерінің 7–8-сыныптарында оқитын ер балалар арасында бес табан ұлттық ойынынан жарыс өтіп, жасөспірімдердің шапшаңдығы мен ептілігі, мергендігі мен төзімділігі сыналды.

Жарысқа барлығы 15 команда қатысып, әр команда өз шеберлігін жоғары деңгейде көрсете білді. «Сен тұр, мен атайын» дегендей, сайдың тасындай іріктелген командалар арасында бәсеке өте қызу өтті. Қатысушылардың осалы болмады, әрбір ойыншы жеңіске деген жігерімен, ұлттық ойынға деген қызығушылығымен көзге түсті.
Тартысты өткен жарыс нәтижесінде финалға жолдама алған командалардың қатарында біздің А.Құнанбаев атындағы мектеп-гимназияның командасы да болды. Білім ордасының намысын қорғаған оқушылар ойын барысында жоғары дайындықтарын көрсете білді. Команда құрамында бірінші сақада – Рамазан Болат, екінші сақада – Әбумәнсұр Рамазан, үшінші сақада – Алтынбек Егінбай өнер көрсетіп, бірліктің үлгісін танытты.
Жарыс қорытындысы бойынша біздің А.Құнанбаев атындағы мектеп-гимназияның командасы жалпы командалық есепте жүлделі ІІ орынды қанжығасына байлады. Бұл – жас спортшылардың қажырлы дайындығы мен ұлттық ойынға деген құрметінің айқын көрінісі. Осындай жарыстар жасөспірімдердің рухын көтеріп, салт-дәстүрге деген сүйіспеншілігін арттырып, саламатты өмір салтын қалыптастыруға өлшеусіз үлес қосады.

Наурыз ОРАЗБАЕВ,
А.Құнанбаев атындағы
мектеп-гимназияның дене шынықтыру
пәнінің мұғалімі,
Арқалық қаласы