Биік белеске бастар жол

Білім күні Сарысу негізгі орта мектебінде бірінші сыныптың табалдырыған аттаған балғындар қолына «Әліппе» алып, сауатын ашты. Енді, міне, бар ғылым-білімнің басы болған оқулыққа алғыс ретінде «Қош бол, құтты Әліппе!» атты ертеңгілік өтті.

Әліппемен қоштасу ертеңгілігіне 1-сынып оқушылары белсенді қатысып, өнерлері мен 4 ай бойы алған білімін ортаға салды. Ертеңгілікте мектеп директоры Жақан Қошмағанбетов оқушыларды өміріндегі бір белесімен құттықтап, ғылым мен білімнің шыңына жету жолында сәттілік тіледі. Артынша «Әліппе» оқулығын жақсы оқып бітіргені үшін жас өрендерге мадақтама қағаздары табысталды.

Салтанатты ертеңгілікте ата-аналардың атынан сөз алған Жанат Ұзақбайқызы оқушыларға алдағы уақытта сапалы білім мен тәрбие алуға, еліміздің үлгілі азаматтары болып қалыптасуына тілектестігін білдірді. Алдағы уақытта жас өрендеріміз білімін молайтып, оқудың алды болып, биік белестерді бағындырады деген сенімдемін. «Тәрбие – талбесіктен» дейді ғой. Ата-аналары бойына сіңірген ізгі қасиеттері өмірлік бағдар болып, ұстазынан алған тәлімі шырақ болып, өмір жолында адастырмайды деген ойдамын.

Индира ҚАНҒОЖИНА,
Сарысу НОМ бастауыш
сыныптар мұғалімі,
Жангелдин ауданы