Білім мен инновация тоғысқан алаң

Амангелді ауданындағы Тасты жалпы білім беретін мектебінде «Адал азамат» біртұтас тәрбие бағдарламасы аясында аудандық «SMART BALA» жобасы – жас өнертапқыштар әлемінде!» тақырыбында байқау ұйымдастырылды.

Білім додасы оқушылардың шығармашылық қабілетін шыңдап, ғылыми ізденісін қолдауға және инновациялық ойлауын қалыптастыруға бағытталған маңызды алаңға айналды. Жас ұрпақтың цифрлық сауаттылығын арттыру, инженерлік ойлау қабілетін дамыту, заманауи технологияларды тиімді қолдана алатын көшбасшы ұрпақ тәрбиелеу, сонымен қатар білім алушылардың жобалық жұмыс дағдыларын қалыптастыру көзделген байқауға ауданның 11 мектебінен 19 оқушы қатысты. Сайыс «Цифрлық жоба» және «SMART POSTER» аталымдары бойынша ұйымдастырылды.
Қатысушылардың жұмысына аудандық білім бөлімінің әдіскерлері Мақпал Кәкімбекқызы мен Ұлжалғас Алпысқызы, сондай-ақ Жалдама жалпы білім беретін мектебі директорының тәрбие ісі жөніндегі орынбасары Рауан Серажденұлы қазылық етті. Байқауға ұсынылған жобалар мазмұны жағынан алуан түрлілігімен ерекшеленді. Қатысушылар Smart-мектеп макеттерін, экологиялық бағыттағы инновациялық жобаларды, IT және робототехника саласындағы тың идеялармен қатар цифрлық қауіпсіздік пен жасанды интеллектке негізделген жұмыстарын қорғады.

Жобаларды таныстыру кезеңі жоғары деңгейде өтіп, қатысушылар өз идеяларын сенімді түрде ұсынып, қойылған сұрақтарға нақты жауап берді. Әділ қазылар алқасы ұсынылған жұмыстарды жаңашылдығы, практикалық маңыздылығы, ғылыми негізділігі, безендірілу сапасы мен қорғау шеберлігі бойынша бағалады. Осылайша үздік жобалар анықталып, жеңімпаздар дипломдармен және Алғыс хаттармен марапатталды. Бұндай игі бастамалардың нәтижесінде ізденімпаз, білімді әрі елжанды жас ұрпақ қалыптасатыны анық.

Луиза АБДИРОВА,
Тасты жалпы білім беретін мектебінің
тәрбие ісі жөніндегі орынбасары,
Амангелді ауданы