«Білімнің кілті – бастауышта»

Алтынсарин ауданында әдіскер Маржан Серікбайдың ұйымдастыруымен мақала тақырыбымен аттас бастауыш сынып мұғалімдеріне арналған съезі өтті. Съезге аудандық және ауыл мектептерінен 38 бастауыш сынып мұғалімдері қатысты.

Бастауыш сынып – бұл оқушы тұлғасы мен санасының қарқынды дамитын қайталанбас кезеңі әрі оқушыны тұлға етіп қалыптастырудың алғашқы баспалдағы. Бастауыш мұғалімдерінің көңілінде жүрген біраз мәселелер қозғалған съезд барысында бастауыш сыныпты оқытуда инновациялық технологияларды қолдану бағытындағы мұғалімдердің шығармашылығы мен жаңалықтарынан көрме ұйымдастырылып, тыңдаушылар әртүрлі дидактикалық материалдармен қоржындарын толықтырды. Съезде бастауыш сынып мұғалімдерін толғандырып жүрген тақырыпта баяндамалар оқылды.

«Бастауыш мектеп жасындағы медиабілім» тақырыбында Больше-Чураков жалпы білім беретін мектебінің бастауыш сынып мұғалімі Н.Павлюк, «Бастауыш сыныптарда жаңартылған білім беру бағдарламасының ерекшеліктері» тақырыбында Ы.Алтынсарин атындағы Обаған жалпы білім беретін мектебінің бастауыш сынып мұғалімі М.Тенсел, «Әр оқушының оқу нәтижесіне жету үшін сабақтың мақсаттарын жүзеге асыру» тақырыбында Силантьев жалпы білім беретін мектебінің бастауыш сынып мұғалімі Л.Михайловская, ал «ББЖМ дайындық кезінде функционалдық сауаттылықты қалыптастыру» тақырыбында Силантьев жалпы білім беретін мектебінің бастауыш сынып мұғалімі О.Кужагильдина баяндамасын оқыды. Съезд соңында аудандық әдіскер М.Серікбай сөз сөйлеп, съезд қатысушыларының ұсыныс, пікірлерін тыңдап, қарарын қабылдады.

Манар ТЕНСЕЛ,
Ы.Алтынсарин атындағы
Обаған ЖББМ бастауыш
сыныптар мұғалімі,
Алтынсарин ауданы