Болашағымыз – білімді ұрпақ

Дарын – адам бойындағы асқан талант, ерекше қабілет. «Дарынды бала алдымызға қашан келеді?» деп күтудің қажеті жоқ, керісінше, балалардың бойындағы қабілетті ашып, қоғамның лайықты тұлғасын дайындау жолында еңбек етуіміз қажет.

Бүгінгі қоғам алдында, әрбір ұстаздың алдында қабілетті оқушыларды іздеп тауып, оларды тәрбиелеу мен оқыту мақсаты тұр. Дарынды балалармен жұмыс істеуде ұстаздың өзі бірінші болып ізденеді. Ұстаз ретінде оқытып жүрген оқушыларымның өзіндік ерекшеліктерін зерттеп, біліп алған соң ғана, оларды дамыту деңгейіне орай әдіс-тәсілдерді іріктеп, талдап, қолдануға, жетілдіруге ерекше назар аударып келемін.
Сондай дарынды оқушыларымның бірі – 1 «Б» сынып оқушысы Раяна Абылайханқызы. Раяна үш жасынан бастап ән айтып, би билейді. Оқу жылының басынан мектеп абыройын еселеген дарынды оқушымды қалай мақтасам та артық болмас. Мектеп өмірінде болып жатқан түрлі іс-шараларға белсене қатысып, білім, өнер додаларында сан мәрте жеңіс тұғырынан көрініп жүрген дарынды шәкірттеріміздің еңбектері қашан да елеулі.
Шығармашылықты серік еткен Раяна республикалық «Қысқы ертегілер» байқаудың І дәрежелі дипломын, облыстық «Атамекен» танымдық-зияткерлік олимпиадасының І дәрежелі дипломын иеленді, республикалық «Мұқағали оқулары» көркем сөз сайысының жүлдегері, «Бала дарын» республикалық байқауының І дәрежелі дипломы, сондай-ақ республикалық «Ақбота» зияткерлік олимпиадасының І дәрежелі дипломы және «Алтын дауыс» қалалық вокалдық конкурсының І орын иегері. Қалалық «ЖҰЛДЫЗ-LIVE» патриоттық ән байқауынан да жүлделі ІІ орынды қанжығалаған. Республикалық «Жарық жұлдыздар» балалар журналына Раянаның өнері жайлы мақала жарияланды.
«Ұрпағы білімді халықтың болашағы бұлыңғыр болмайды» дегендей, қасиетті қарашаңырақ А.Байтұрсынов атындағы мектеп-гимназия қабырғасында білім алып отырған шәкірттеріміздің арқасында мектебіміздің мерейі әлі талай артып, абыройы қашан да асқақ боларына сеніміміз мол.

Жанар КАБДУАЛИЕВА,
А.Байтұрсынов атындағы
мектеп-гимназияның
бастауыш сынып мұғалімі,
Арқалық қаласы