Бұқар жыраудың ұлағаты

Выпуск - №45(593) : 01.12.2023

654

Қостанай қаласындағы А.С. Пушкин атындағы балалар кітапханасында Бұқар жыраудың 330 жылдығына арналған «Ұлылар ұлағаты» атты тарихи сағат өтті. Іс-шараға №2 мектеп-лицейдің оқушылары мен оқытушысы Динара Ахметбекова арнайы қатысты.

Бұқар жырау аласапыран заманда ел бірлігін ту етіп, сыртқы жаулармен күреске үндейді. Халық ақ киізге көтеріп сайлаған Абылай саясатын қолдап, хандықты одан әрі нығайту жолында күреседі. Жырау, жоңғар-қалмақ шайқасының барлық ауыртпашылығын елмен бірге көтерумен қатар хан-сұлтандарға, қолбасшыларға кеңес беріп, идеологиялық тұрғыдан бағыт-бағдар көрсетіп отырған.

Қазақтың ұлттық ауыз әдебиетінде даналық сөздерімен өшпес із қалдырған, сол уақыттың өзінде-ақ ұлан-ғайыр даламызда Үш жүзге ортақ ұлағатты жырау болған Бұқар Қалқаманұлының есімін қазақ халқы әрқашан зор мақтанышпен қадір тұтады. Кітапханадағы тәлім мол іс-шараға қатысқан қонағымыз Динара Қожатайқызы Бұқар жыраудың шығармашылығымен қоса өмірбаяны туралы көптеген қызықты оқиғаларды әңгімелеп берді.

Ақпараттар балаларға неғұрлым түсінікті болуы үшін, қосымша бейнероликтер көрсетілді. Осы тұста тағылымға толы шараға атсалысқан, арнайы қатысқан кеш қонақтарына ерекше алғысымызды білдіреміз.

Эльмира МИРЗАЛИЕВА,
А.С. Пушкин атындағы
балалар кітапханасының
кітапханашысы,
Қостанай қаласы