Дарынды бала – ел болашағы

Зерттеу жұмысы – шығармашылық үрдіс. Зерттеу жұмысымен айналысу, шығармашылық жоба жазу оқушының аналитикалық ойлау қабілетін дамытады, шешім қабылдай алу қабілетін қалыптастырады.

Оқушыны ғылыми-зерттеу жұмысына қатыстыру үшін, ең алдымен, оны қызықтыра отырып, зерттеу талабын қалыптастыру керек. Яғни, оқушы ақпаратты алып қана қоймай, оны басқаларға хабарлай білуге талпынуы тиіс. Расында, тұлғаға дұрыс бағыт беру, даму, қалыптасу аймағына енгізу, белсенділігін туғызу, өзін-өзі тәрбиелеу іс-әрекетіне ықпал ету – ұстаздар алдындағы жауапты міндет. Жаңа ғасырға қадам басқан жас жеткіншектердің заманға бейімділігі болуы керек. Ол өмірдің әр тетігіне үңіліп, тығырықтан шығар жолға даяр болуы қажет. Осы тұста ғылыми-зерттеу жұмыстардың атқарар рөлі зор.

Мектебіміздің оқушылары ғылыми жоба сайыстарына үнемі қатысып келеді. Үстіміздегі оқу жылында аудандық және облыстық 2-7 сынып оқушылары арасындағы «Зерде» республикалық зерттеу жобалар конкурсына жұптық жұмыспен Аяулым Мирамхан мен Елдос Мергенбай «Ешкі сүтінің пайдасын қазақи бренд түрінде жаңғырту» тақырыбында жетекшілері Рагүл Токаеваның сүйемелдеуімен өте ауқымды, тағылымы мол жұмысты қорғады. Байқау нәтижесінде ауданда 1-орынға, ал облыс бойынша 3-орынды иеленіп, мадақтама мен дипломмен марапатталды.

Бағындырған белесімен ұлағатты ұстазымыз Рагүл Сүлейменқызын және оқушыларымызды құттықтай отырып, алдағы уақытта шығармашылық жетістіктері жемісті болсын деп тілейміз.

Динара БАЙГЕНЖИНА,
Дәмді ЖББ мектебі
директордың оқу ісі
жөніндегі орынбасары,
Науырзым ауданы