Дарынды шәкірттер – мақтанышымыз

«Халықты халықпен, адамды адаммен теңестіретін – білім», – деп М.Әуезов айтқандай, келешек кемел білім мен ұлағатты тәрбиеге байланысты. Мектеп пен қала абыройын түрлі деңгейде еселеген оқушыларымызды қалай мақтасақ та артықтық етпейді.

Мектеп өмірінде болып жатқан түрлі іс-шараға белсене қатысып, білім, өнер додаларында сан мәрте жеңіс тұғырынан көрініп жүрген дарынды шәкірттеріміздің еңбектері қашан да елеулі. Мұғалімдерінің ыстық ықыласы мен сүйіспеншілігіне бөленген оқушыларымыздың бойларындағы дарындық қасиет ата-анасынан бойларына дарып, өскен ортасында, яғни, мектеп қабырғасында шыңдалып, ұстаздарының қолдауымен жетіле түсті.
Жас өркеннің бойындағы ерекше қабілеті мен дарындылығын тани білу, оның ары қарай дамуына бағыт-бағдар бере білу – ерекше қиын да қызықты іс. Алайда, әр баланың жеке қабілетін анықтап, оны сол бағытта жетелеу – ұстаздың басты парызы. Баланы заман талабына қарай көрегендікпен икемдеп, озық өнегені санасына сіңіре білу, оларды шығармашылық бағытта жан-жақты дамыту – бүгінгі күннің басты талабы.
Осындай игі қасиеттерді бойына жинап, жетекшілік етіп жүрген сыныбына бар мейірімін төгіп, биіктерді бағындыруына себепші бола білген орыс тілі мен әдебиеті пәнінің мұғалімі Жұлдызай Балғабайқызы мен жұлдызды сыныптың алғашқы ұстазы Дидар Балгабайқызы бала бойындағы дарынды танып, жетілдіруде еткен еңбектері зор. Оқу мен тәрбиені қатар ала білген мектебіміздің озық ойлы 11 «А» сынып оқушылары – Аружан Бауыржанқызы, Назым Тұрсынқызы, Али Есетұлы, Дильназ Канатовна, Қадырқызы Шұғыла, Ақния Дарханқызы, Назым Қуанышқызы, Толқын Талғатқызы, Күләш Сакенқызы, Санерке Исақызын әрдайым мақтан етеміз.
«Ұрпағы білімді халықтың – болашағы бұлыңғыр болмайды» дегендей, 60 жылдан асқан тарихы бар, қасиетті қарашаңырақ Б.Майлин атындағы №3 жалпы білім беретін мектебі қабырғасынан ұшқалы отырған аяулы шәкірттеріміздің арқасында мектебіміздің мерейі әлі талай артып, абыройы қашан да асқақ боларына сеніміміз мол.

Индира БАЛТАБАЕВА,
Б.Майлин атындағы
№3 ЖББМ директорының
ғылыми-әдістемелік
жұмыстар жөніндегі
орынбасары, биология
пәнінің мұғалімі,
Арқалық қаласы