Дойбыдан мектепішілік турнир

Қазақстан Республикасы күнін мерекелеу қарсаңында Мичурин жалпы білім беретін мектебінде шахмат және дойбы ойындарының шынайы әуесқойлары үшін 2-10 сыныптар арасында дойбыдан мектеп турнирі өтті.

Туғаннан бастап өміріміз адамның физикалық және рухани мүмкіндіктерін дамытуға ықпал ететін ойындармен бірге жүреді. Қазіргі таңда дойбы зияткерлік ойындар қатарында шахматтан кейін екінші орында тұр және ол спорт түрлерінің біріне айналды. Ойын логикалық ойлауды, тапқырлықты, абстрактілі ойлау қабілетін дамытады, табандылықты, кеңістіктік қиялды тәрбиелейді, ойда әрекет ету қабілетін дамытады, ең бастысы – адамның есте сақтау қабілетін арттырады.

Мектебімізде 2-10 сынып оқушыларына арналған «Шахмат және дойбы» секциясы біздің мектептің педагогі Диас Ауескановтың жетекшілігімен өткізіледі. Дойбы ойынынан өткен турнирді Мичурин мектебінің дене шынықтыру пәнінің мұғалімдері Диас Ауесканов пен Серік Бижанов Қостанай ауданының балалар шығармашылық үйімен бірлесіп ұйымдастырды. Жас дойбы әуесқойлары алғашқы қадамдардан бастап, «шабуылдар» жасап, барынша жеңіске жетуге тырысты.

Турнир қорытындысы бойынша қатарластарынан оза шапқан жүйріктер лайықты марапатына ие болды. Нәтижесінде 1-орынға – Ислам Мақатаев, Ольга Юртаева, 2-орынға – Ерасыл Әлімжан, Камила Смирнова, 3-орынға – Ескендір Ибрашев, Томирис Кишкимбаева ие болды. Турнир жеңімпаздары медальдармен және грамоталармен марапатталды, ал қалған қатысушылардың барлығына тәтті сыйлықтар табысталды. Жеңімпаздарды лайықты жеңісімен құттықтаймыз!

Ерасыл ҚАЗЫБАЕВ,
Мичурин ЖББМ
директордың тәрбие ісі
жөніндегі орынбасары,
Қостанай ауданы