Екі мектеп – бір мұрат

Рудный қаласындағы М.Дулатұлы атындағы жалпы білім беретін мектепте «Ұлы тұлғалар жолы» облыстық жобасы аясында маңызды тарихи кездесу өтіп, екі аттас білім ордасы арасында ынтымақтастық және өзара іс-қимыл туралы меморандумға қол қойылды.

Рудный қаласындағы мектеп пен Жангелдин ауданындағы мектеп арасындағы бұл келісім – жай ғана ресми құжат емес, тарихи сабақтастықты жалғаған, рухани жауапкершілікті арттырған әрі болашаққа бағытталған стратегиялық серіктестіктің бастауы болды. Тағылымды кездесу ұлт руханиятының шамшырағы, Алаш қайраткері Міржақып Дулатұлы мұрасын ұлықтауға арналды. Салтанатты жиында екі мектептің директорлары құттықтау сөз сөйлеп, білім беру саласындағы ынтымақтастықты дамыту, тәжірибе алмасу әрі бірлескен жобаларды жүзеге асыру бағытындағы ортақ мақсаттарға тоқталды.
Іс-шараның әсерлі сәттерінің бірі – Жангелдин өңірінен әкелінген Міржақып Дулатұлының туған жерінің топырағы, жусаны мен киелі жердің тасының мектеп музейіне табысталуы болды. Бұл символдық тарту өскелең ұрпақ санасына туған жерге, оның тарихына құрмет пен рухани байланысты терең сіңірді. Бағдарлама аясында білім алушылар авторлық өлеңдерін оқып, ұлттық рухты асқақтатты. Артынша «Балалар кітапханасы» жобасы таныстырылып, «Елі үшін туған ердің мәңгілік мұрасы» көрмесі көпшілік назарына ұсынылды. Сондай-ақ робототехника үйірмесінің жетістіктері көрсетіліп, «Домбыра дастан» музыкалық бағдарламасы ұлттық өнерді дәріптеді. Іс-шара барысында «Бес асық» ұлттық ойыны ұйымдастырылып, «Жас сарбаз» әскери-патриоттық бағыты аясындағы таныстырылым өтті. Қонақтар ашық сабақтарға қатысып, үйірме жұмыстары мен оқушылардың жетістіктерімен жақынырақ танысты.
«Екі мектеп – бір мұрат» қағидасы негізінде алдағы уақытта бірлескен ғылыми жобалар, онлайн семинарлар, оқушылар алмасу бағдарламалары мен ортақ патриоттық іс-шаралар жоспарлануда.

Гүлнәз ӨМІРЗАҚ,
Аружан ҚОНАҚБАЕВА,
А.Байтұрсынұлы атындағы
ҚӨУ журналистика мамандығының
4-курс студенттері