Футболдан ашық турнир

Арқалық қаласындағы қосымша білім беру орталығында спорт ардагері, ҚР еңбек сіңірген жаттықтырушысы Ромашенко Николай Павловичті еске алуға арналған қала мектептерінің оқушылары арасында футболдан турнир ұйымдастырылды.

Дәстүрлі іс-шараның мақсаты – оқушылар бойында саламатты өмір салтын қалыптастырып, футбол ойының оқушылар арасында кеңінен насихаттау. Екі күнге созылған ашық турнирге қала мектептерінен жалпы саны 10 команда 80-ге жуық оқушы қатысты. Турнир қызықты да тартысты өтті. Турнирге қосымша білім беру орталығының «Былғары доп» футбол клубының жетекшісі Серік Қорқытбаев және қосымша білім беру педагогі Иманбек Айтказин төрешілік етті.

Жалпы футбол ойынының қорытындысы бойынша І орынға Ы.Алтынсарин атындағы гимназия командасы, ІІ орынға М.Әуезов атындағы №5 мектеп командасы, ал ІІІ орынға А.Құнанбаев атындағы мектеп-гимназия командасы ие болды. Жеңімпаз командалар қосымша білім беру орталығының мадақтамасымен және медальмен марапатталса, І орын иеленген командаға кубок табысталды. Қызықты да тартысты өткен футбол жарысы өз мәресіне жетіп, алдағы уақытта да жалғасын таппақ.

Куаныш АБИЛКАИРОВ,
Қосымша білім беру
орталығының спорт
нұсқаушысы,
Арқалық қаласы