Ғасырлар сыр шертеді

Мереке негізгі орта мектебінде сәуірдің 7-11 аралығында «Тіл мен тарих – ғасырлар куәсі» атты гуманитарлық-эстетикалық пәндер апталығы өтті. Апталықтың ашылуынан бастап ашық сабақтар мен түрлі іс-шаралар жоспарға сай ұйымдастырылды.

Апталықтың ресми ашылуы ұлы тұлғалардың бейнесін сомдаған театрлық көрініспен басталып, ұлттық ойындармен жалғасты. Пән мұғалімдері ашық сабақтармен қатар сыныптан тыс түрлі іс-шаралар өткізді. Оған қоса Абай Құнанбайұлының 180 жылдық мерейтойына орай 5–9-сынып оқушылары арасында «Абайды оқы, жалықпа!» мәнерлеп оқу сайысы ұйымдастырылса, ағылшын тілі пәні бойынша «Romeo and Juliet» атты театрлық қойылым сахналанды.
Дене шынықтыру пәні мұғалімдерінің бастамасымен ұстаздар арасында «Көңілді мәре» атты интеллектуалдық-спорттық сайысы өтті. Тартысты сайыс нәтижесінде жаратылыстану-математика пән бірлестігінің ұстаздары жеңіске жетті. Апталықтың жабылу салтанатында ашық сабақтарға асқан белсенділікпен қатысқан, үздік өлеңдер оқыған және танымдық байқауларда көзге түскен оқушылар мадақтама қағаздары мен тәтті сыйлықтармен марапатталды.

Галия МОЛДАБЕКОВА,
Мереке негізгі орта мектебінің гуманитарлық-
эстетикалық пәндер бірлестігінің жетекшісі,
Науырзым ауданы