Игі істер марафоны

Жастарды қайырымдылық, жақсылық жасауға шақыру мақсатында Ыбырай Алтынсарин атындағы Обаған жалпы білім беретін мектебінің оқушылары ер мұғалімдердің басшылығымен игі істерге ат салысты.

Олар «Игі істер марафоны» аясында ауылдың тұрғындарына (физикалық белсенділіктен ажыратылған және жалғызбасты қарт кісілерге) үйлерінің маңайындағы қарды тазалап, қар астында қалған кісілердің жолдарын ашып беру сияқты игі істерді жүзеге асырды. Адам бойындағы жақсы-жаман қасиеттердің көпшілігі үлкеннен көріп өскен үлгі-өнегеге байланысты қалыптасатыны белгілі. Аталған марафон аясында балалар жақсылық жасау өзгенің көңілін разы қылып қана қоймай, өзіңе де істеген ісіңе деген ризашылық сезімін сыйлайтынын түйді.
Ауылымыздың асыл қазыналары – ақ самайлы қарияларымыз: «Мұндай істі өзіміз тындыра алмайтын едік», – деп мектеп оқушыларына зор ықыласпен алғыстарын білдіріп, жүрекжарды лебіздері мен батасын беріп, жүзіндегі қуаныштарын жасырмады. Ал оқушыларымыз болса осындай игі шараларды ұйымшылдықпен жүргізіп, алдағы уақытта да абыройлы істер атқарсақ деген ниетте.

Аягөз ҒАЛЫМ,
Ы.Алтынсарин атындағы 
Обаған ЖББМ биология
пәнінің мұғалімі,
Алтынсарин ауданы