Қарттарым – асыл қазынам

Қазан айының 1-і – Халықаралық қарттар күні. Үлкенді сыйлау, қарияны құрметтеу – қазақ халқының ата салты екені белгілі. Осы орайда Б.Қолдасбаев атындағы жалпы білім беретін мектебінде «Қарттарым – асыл қазынам» атты мерекелік іс-шарасы өтті.

Іс-шара оқушылардың бойына халқымыздың қадір-қасиетін сіңіру, үлкенді сыйлай білуге, өз ата-бабасын ұмытпай, есте сақтауға және аталы сөзден ғибрат алуға тәрбиелеу мақсатында ұйымдастырылған. Атаулы шараға білім ордасында ұзақ жылдар бойы қызмет еткен, зейнеткер ұстаздар қауымы арнайы шақыртылды. Келген қонақтарға оқушылардың арнайы әзірлеген мерекелік бағдарламасы ұсынылды.

Мектеп өнерпаздары тақырыпқа сай әндер шырқап, би билеп, көркем сөз оқыды. Олар оқушылардың өнерлерін тамашалап, мектеп ұжымына жылы лебіздерін білдірді. Мектеп басшысы Мұхаммедәлі Серікұлы мектеп ұжымының атынан арнайы құттықтаулар мен гүл шоқтарын тапсырды. Соңында зейнеткер, ұлағатты ұстаз Абай Кәрімұлы оқушыларымызға игі тілегін айтып, алғысын білдірді.

Ортамызда жүрген қарияларымыздың бір кезде елі, халқы, келешек ұрпағы үшін жасаған игі істері ерекше орын алады. Қазақстанның өсіп-өркендеуіне, еліміздің бейбітшілікте, тыныш өмір кешуіне үлестерін қосқан осы ардақты да аяулы қарттарымыздың арқасы деп білеміз. Отан деп, тынымсыз еңбектерімен мемлекетіміздің негізін салуға жол ашқан алдыңғы буын ата-әжелеріміздің, қарттарымыздың төл мерекесі. Олардың жүріп өткен жолдары бүгінгі ұрпаққа – табылмас қазына.

Әнет ЖҰМАБЕК,
Қолдасбаев ОМ
көркемдік жетекші,
Амангелді ауданы