«Қазақстан – жаңа әлемде»

Осындай тақырыпта Балалар жылы аясында «Қостанай Дарыны» РҒПО ұйымдастыруымен облыстық шығармашылық байқау өтті. Ол жалпы төрт номинация бойынша жүргізілді: кескіндеме, графика, мүсін, сәндік-қолданбалы өнер. 

Байқау оқушылардың көркемдік және шығармашылық қабілеттерін дамыту, өнер саласындағы дарынды оқушыларды анықтау. Оқушылар Ғабит Мүсіреповтың 120 жылдығына орай жазушының шығармалары бойынша, «Планета – біздің игілігіміз», М.Мәметованың 100 жылдығына орай «Естелік жолдары бойынша» тақырыптарында жұмыстарын ұсынды. Байқауға облыстың 6 өңірінен 29 оқушы, дарынды балаларға арналған «Білім-Инновация» лицей-интернаты және Қостанай қаласындағы физика-математика бағытындағы Назарбаев Зияткерлік мектебі қатысты.

Жалпы 14 оқушы жүлдегер атанды. Балалар шығармашылық үйінің тәрбиеленушілері осы байқауға белсенді қатысып, 5 үздік жұмысты ұсынды. Нәтижесінде мүсін номинациясында екінші орынға Ақарыс Талғатұлы ие болып, ол пластилиннен, қақтамадан (фольга) және басқа да материалдардан Мәншүк Мәметованың мүсінін жасап, ұсынды. Сәндік-қолданбалы өнер номинациясында екінші орын иегері Алиса Коростелева Жер глобусының макетін жасап, онда бүкіл әлемнің экологиялық проблемасын көрсетті.

Дәл осы аталымда екінші орынды қанжығалаған Арайлым Қабден Ғ.Мүсіреповтың шығармасынан сұлу әйел бейнесін көрсетті. Ал кескіндеме номинациясында үшінші орынды иеленген Артем Молоканов суретте бар әлемнің экологиялық проблемасын көрсетуге тырысып бақты. Сондай-ақ графика номинациясында үшінші тұғырға тұрақтаған Замира Сәбитбек Ғ.Мүсіреповтың шығармасының тақырыбына сай графика стилінде сурет салды. Барлық жұмыстар қызықты, танымдық сипатқа ие болып қана қоймай, тақырыпқа сай болды.

Назым БАТЫРБАЕВА,
Балалар шығармашылық
үйінің директоры,
Федоров ауданы